Dos caha cu comestible a somenta for di frigidaire
ORANJESTAD (AAN): Na Seroe Pita, ladron a drenta horta den frigidaire di e famia.
Ladron no conoci piedad, nan ta warda e momento oportuno pa drenta horta y sali bay. Posiblemente esaki lo por a pasa duranten cu e señora denunciante tabata na cas. No a descubri ningun kiebro cu por indica con e ladron a kibra drenta horta pertenencia di e señora.
Tabata diamars mainta despues di 11’or, cu central di polis a dirigi patruya Santa Cruz na e direccion.
Segun e señora inicialnan P.L. di 69 aña, cu el a bin constata cu dos caha cu ta contene comestible a somenta for di su frigidaire. Con esaki por a tuma lugar no por a saca afor.
Parce cu e ladron a probecha e momento oportuno pa drenta den e cas y habri frigidaire y pasa man pa e dos cahanan.
E señora mes no sa ki ora esaki a tuma lugar, ta ora el a habri su frigidaire el a bin ripara esaki.
No ta prome caso cu autoridad ta atende ladronnan ta usa tur sorto di tactica pa nan logra comete nan fechoria y bagamunderia. Te dia palo hala cu nan, horta coy come te dia esnan perhudica pone “Rattenval”.
