E hotel di Nel un crimen
Analisis politico
ORANJESTAD (AAN): Loke a sosode cu un pida tereno grandi y valioso di nos pueblo ta algo cu lo keda pa responsabilidad di Nel Oduber pa resto di su bida. Ya caba e ta e persona cu tabata responsabel pa ceramento di Valero y su partido MEP pa ceramento di Lago tambe. Ya caba ampliamente a worde mustra cu Valero a ofrece Nel Oduber pa paga tur aña un minimo di 50 miyon Florin si Nel a kita e BBO for di Valero y Valero a inverti 2 biyon Florin pa renoba e refineria completo haciendo e un planta moderno cu lo por a competi den e mundo petrolero.
Nel Oduber a kere cu e ta sabi y cu Valero ta bluf y lo keda en todo caso. Esaki mescos cu e tempo aya cu Lago.
Valero a cera y ta di spera cu e gobierno nobo lo logra di mantene e refineria pa nos isla. Mescos tambe Nel Oduber ta responsabel pa e binimento di un hotel mas ariba un di e poco playanan cu a keda pa nos pueblo.
Un decision criminal contra naturalesa y contra nos hendenan. Un tempo despues cu Lago a cera tabatin un necesidad pa busca mas hotel pa duna trabao nan nos desempleadonan pero esey absolutamente no ta e caso mas awe.
Loke mester a haci den e sector di turismo ta eleva e calidad di nos hotelnan y no crea mas camber. Ta increibel cu Nel y su coleganan a firma e contratonan cu e esnan di e hotel un dia prome cu nan a baha como ministro.
Algo cu ningun momento ta cos di hende drechi. Decencia ta exigi pa un gobierno cu ta bayendo solamente atende e asuntonan coriente y sigur no pa tuma decisionnan grandi cu ta mara henter nos comunidad pa decadanan. Esaki a pone e gobierno nobo den un posicion sumamente dificil.
E gobierno nobo no kier e hotel y sigur no ariba e lugar cu e ta bin pero si a nenga pa e hotel worde construi esaki a costa nos miyones di Florin cu no tin. E malhecho aki ta e ultimo acto maligno cu e gobierno di MEP a comete.
Pero uno di un magnitud cu ta hopi dificil pa imagina. Ta ken no ta corda con dirigentenan di MEP a instiga contra di un race track pa Sanicolas cu casi lo no tabatin efecto ariba naturalesa di e lugar y awe e mesun hendenan ta aproba un hotel grandi ariba un di e ultimo pidanan di nos isla no solamente di animalnan cu ta biba eynan pero cu ta kita e placer di bida di hopi di nos hendenan.
Sin lo minimo di escrupulo Nel Oduber y su coleganan a trapa ariba e reglanan mas fundamental di un democracia firmando e contratonan un dia prome cu a baha. Esaki ta un di e puntonan cu no mester worde lubida. Hopi biaha nos a trece padilanti cu ta tarea di no s tur pa keda corda nos hendenan kico un gobierno di MEP ta significa pa nos pais.
E maldad y destruccion di un gobierno di mep ta asina catastrofal cu nunca mas e hendenan aki mester haya poder pa ripiti loke nan a haci. Y pesey tambe tur hende mester ta alerto cu esnan cu a tuma over rienda di e partido geel no ta otro cu esnan cu ta bayendo.
Alcontrario den e corto tempo cu nan ta activo nan a demsotra cu nan ta mes malo cu e bieunan y tin cierto politico nobo den MEP cu a mustra caba cu nan ta pio cu esnan saliendo.
E hendenan aki ta den politica solamente pa un motibo y esey ta pa nan enrikece nan mes y esan cerca di nan. Ningun momento durante añanan di nan gobernacion nan a mustra cu nan ta sinti algo pa nos pueblo y cu nan ta dispuesto pa traha na bienestar di e pueblo.
E speranza cu tabata biba cerca cierto votadornan di MEP mes cu a fada di e nivel malisimo di nan dirigentenan y kier a mira un generacion nobo di MEP di hende drechi ya a bay perdi. Nan mes ta mira cu e grupo cu awo ta para cla pa tuma over lo no trece ningun cambio den nan partido. Esnan cu ta bringando pa liderato di e partido ta un berguenza pa Aruba.
