Diario Online

Evelyn Wever-Croes ta lubida di bisa cu esun cu ta contra di eliminacion di Swiss Model ta papa Hendrik mes

Publication: Friday, 26 February 2010. Categoria: General

Oficina di abogado a gana bruto cu e Modelo Suizo
ORANJESTAD(AAN): Ta parce cu parlamentaria Evelyn Wever-Croes ta totalmente bruha den ken a eligi’e pa ta den parlamento. Ora cu e ta bisa cu “hopi hende ta contra eliminacion di… Modelo Suizo” e no por ta refiriendo na e pueblo ey ‘fo. Papa Hendrik cu ta gana bruto na custiya di e “Model Suizo” ta practicamente e unico persona cu tin sentimento nan fuerte contra eliminacion di e modelo aki. E ta kere cu hopi hende no ta al tanto cu Papa Hendrik, hunto cu su Omo, ta e arkitecto intelectual (principal) di e ley aki.

E motibo mester por ta sinta den e hecho cu oficina di abogado ta gana masha placa ora cu tin di trece hende pa permisonan nobo for di exterior cada tanto aña. Segun informantenan, e oficina di abogado en cuestion a gana hopi placa procesando prome permisonan cu mester cada 3 aña: un mina di oro. Ta mas cu bisto cu un di e personannan cu tin mas problema cu awe lo elimina e ley inhusto y irealistico aki ta Papa Hendrik mes.

No por ta asina cu tin hendenan cu ta (por ehempel) ayudante di hendenan grandi, despues di a crea un confianza cu nan, tin di worde saca for di Aruba pa busca un persona straño. Pero for di punto di bista di un hende manera Señora Wever-Croes y papa Hendrik, e ta dificil pa realisa cu e confianza personal di un persona ta mas importante cu cuanto placa mi por ranca for di esnan cu tin di worde busca constantemente for di pafor.

Mas leu ainda, Señora Wever-Croes ta duna como un di e argumentonan contra eliminacion di e modelo Suizo, cu Aruba ta demasiado pobla. Aparentemente e ta lubida ken a horca pueblo cu Ritz Carlton.

Maske con bon e binimento di un hotel di e tipo ey ta, e tin como consecuencia cu mester importa trahador nobo.

Maske cu nan recluta trahadornan local, e trahadornan ey mester bin di un caminda. E cancion di “no haya cama pa tanta gente” e mester a canta pa su mesun lider di partido, Nel Oduber, ora den e ultimo oranan cu e tabata den poder a laga “fix” tur cos pa Ritz Carlton por bin Aruba “no matter what”.

Si Evelyn Wever-Croes ta un bon abogado e por bay check den e dealnan cu Ritz Carlton kende, cu ta hopi cerca di su lider di partido, a beneficia for di e deal aki. Pa nan e tempo ey no tabata conta cu Aruba ta yen?

Con Evelyn Wever-Croes por bin cu cara serio pretende cu awor numa el a realisa cu Aruba ta yen? Ora cu a importa tantisimo hende pa traha den RIU hotel, Señora Evelyn Wever-Croes a keda keto.

Probablemente su oficina mes a procesa e permisonan y tambe e tramitenan pa e hotel aki por a haya e permisonan. E tempo aya e no a realisa esey? Of e ta realisa awor con e y Papa Hendrik a yena Aruba?

Si Evelyn Wever-Croes ta pretende di ta un biento fresco den MEP, e mester cuminsa pa distancia su mes for di tanto Hendrik Croes y di Nel Oduber. Pero lamentablemente esaki no por, pasobra e biento fresco aki ta e mesun biento bieu cu semper Hendrik Croes, Rudy Croes y Nel Oduber a supla den cara di nos pueblo.