FEDEVETA ta tene su prome reunion obligatorio pa 2010
ORANJESTAD (AAN)— Directiva di FEDEVETA kier invita tur su miembronan y tambe esnan cu pa prome biaha kier participa den e campeonatonan di 2010, sea ta 35, 40 of 50, pa ta presente na e prome reunion di directiva cu lo wordo teni diamars awor, 16 di Februari, na nos lugar di custumber, esta Sha Sha na Noord, cuminsando pa 8’or en punto. Manera stipula den e reglamentonan durante e prome reunion directiva diario lo presenta su relatonan di e aña anterior.
Tambe solamente durante e prome reunion tin oportunidad pa entrega por escrito proposishonan pa cambionan di reglamento. E punto di agenda hopi importante durante e prome reunion ta e eligimento di un directiva diario cu ta consisti di un Presidente, Tesorero y Secretario, cual tin e tarea sumo importante pa coordina y dirigi e campeonatonan durante anja 2010.
Ta necesario tambe cu cada team pa medio di un carta dirigi na directiva diario anuncia su representante oficial durante e reunionnan. Tambe mester menciona den e carta e nomber di e suplente di e representante oficial. Durante reunionan ta permiti solamente 1 solo representante pa cada team. Representante
di teamnan cu ta participa pa prome biaha no tin “stemrecht” ainda durante e prome reunion. Den e segundo reunion obligatorio teamnan nobo cual nan peticion pa miembrecia a wordo acepta door di directiva y a cumpli cabalmente cu nan obligacion financiero cu FEDEVETA, ta adquiri su “stemrecht” y por practica esal al instante.
Segun agenda pa e aña 2010 e prome wega di veterano lo start sali riba 6 di maart, e categoria mester ta wordo defini ainda durante e reunionan obligatorio.
Directiva ta hasi un suplica na tur representante pa na ora na reunion, pasobra NO TIN WAITING TIME, y reunion lo start Sali 8’or en punto.
