Minister Hooyboer- Winklaar
Nos ta bayendo den bon direccion y nos hendenan por sinti e diferencia”
ORANJESTAD (AAN) — Ya cu den nos entrevista cu Minister Michelle Hooyboer- Winklaar, nos a toca e tema di hende muher den nos comunidad, DIARIO a puntr’e si den su funcion como unico dama meymey di siete minister masculino, e ta sinti algun tipo di distincion. “ Ami no tin e sinti cu mi ta worde perhudica pasobra mi ta hende muher.
Absolutamente cu no! Mi por bisa cu e tema di hende muher ami so no ta carga, ami kier pa nos hendenan homber, nos ministernan tambe, carga e tema aki y mire como algo hopi importante. No solamente esey, pero e aspectonan social tambe.
Mi ta kere cu e Ministerraad actual, tur ta hopi conciente di e hecho cu nos hendenan muher lo por haci hopi banda di nan, y ami como minister ta haya cu nos ta trahando hopi duro eynan. Nos tin un bon team work”, e dignatario a subraya.
Incluso e dama a comenta cu su coleganan tin hopi comprension pe, cu tambe ta cumpli cu su papel di mama di yiunan chikito. Tambe nos a puntra e mandatario cual ta su aspiracion pa culmina cu exito su cuatro añanan di gobernacion na 2013.
“ Mi sa cu mi ta bay logra un di mi metanan hopi importante, cu ta pa nos economia draai, desaroya su mes y tin crecemento. Pasobra e ora ey gobierno lo por tin mas entrada, y e placa aki por bay den e diferente areanan social, educacion, salud, etc., unda cu e peso ta cay solamente riba gobierno”, e dignatario a remarca.
E mandatario a subraya cu yega na e “diferente pianan di e mesa” e no por hacie su so, pesey e ta sintando cada pasa tres siman, y lo kier hacie cada dos si ta necesario, hunto cu ATIA, Camara di Comercio y Departamento di Economia, pa trece cierto cosnan dilanti, cu kizas ta facil pa resolve si nan ta tuma un decision conhunto, cu por tin un impacto positivo riba nos economia.
“ Ta aspectonan chikito cu na final ta bay ta algo grandi na final. Pasobra cosnan chikito, chikito, ta stroba hopi biaha, y si nos por resolve esey, nos por yega hopi leu”, Minister Hooyboer-Winklaar a subraya.
Finalmente, nos a puntra e dama, si den su periodo aki como politico y mandatario, tin algo cu por a decepciona su persona, riba tereno politico mes. “ Decepiona? No! E ta un algo completamente nobo pa mi, y obviamente tin aspectonan cu a menos bunita, manera hendenan cu tin nan mesun agenda pa por desacredita bo, hasta cu mentira unda e meta ta pa otro handenan desacredita e gobierno actual.
Esey ta e politico, y e ta e parti menos bunita di dje, pero ta algo cu nos mester gewoon acepta, pasobra nos no por cambie hopi lihe, pero si e por cambia despues di cierto tempo. Mi sa cu e parlamentarionan ta trahando riba esey, y Presidente di Parlamento ta haciendo un bon trabao den esey.
“ Nos mester tuma e decisionnan cu ta e mehor decisionnan pa Aruba y ta bay tin diferencia di opinion semper riba esey. Nos por discuti over di esey, pero nos mester wanta e respet pa otro. Y eynan, mi no ta preocupa mi mes mucho riba rumornan, etc.
Ami ta akinan pa traha y ‘that’s it’. Y tur cos cu ta yuda mi logra loke nos a papia, mi ta scucha, mi tin atencion pe. Pero riba cosnan cu no ta yuda yega unda nos kier bay, mi no ta duna nan ni diez seconde di mi tempo!”
Pa conclui nos entrevista e mandatario tabata tin e siguiente palabranan pa nos pueblo.
“ Mi ta kere cu ta hopi importante pa demostra cu nos ta akinan pa traha, cu tin decisionnan cu mester tuma cu no tur ora ni tur hende ta bay gusta, pero mi ta tuma tur decision a base di hecho, y no ta zoomar.
Ta cosnan cu nos a studia prome cu dicidi, y un di e bentahanan cu nos gobierno tin ta cu nos a wak hopi situacion di antemano, y nos a trece un plan di gobernacion prome cu eleccion, unda cu no a dura añanan pa wak e diferente situacionnan.
Ya caba nos sa den ki direccion nos kier bay y nos sa cu tin cosnan cu nos por logra hopi facil, otronan den un of dos aña, otronan den cuatro y por ta cu lo tuma mas largo ainda, pero nos por bisa cu nos ta bayendo den e bon direccion y cu e pueblo por sinti un diferencia.
Esey mi ta kere ta e aspecto di mas importante, y constantemente nos ta scucha kico pueblo ta bisa. Pueblo por tin diferencia di opinion, pero mester por tin un dialogo y eynan nos ta bayendo”, Minister Michelle Hooyboer- Winklaar, titular di Economia, Asunto Social y Cultura, a conclui.
