Homber a destrui auto di Seguridad Nacional den Dakota
Homber a tilda funcionario di tin relacion cu preso den KIA
ORANJESTAD (AAN): Un auto di Gobierno a keda destrui dialuna 4’or di marduga como parti di un pelea amoroso di pareha. E dama ta un funcionario di departamento di Seguridad Nacional y su pareha a destrui e auto den su rabia. E hecho cu carnaval e aña aki tabata riba dia di San Valentino no necesariamente a percura pa menos discusion den pareha. Den oranan lat di marduga di diadomingo manise dialuna 4’or mas of menos, un homber a yega na cas di su enamorada y durante comemento na mesa a start un discusion pisa.
E dama a acusa e homber di lo tin un relacion cu un polis mientras cu e homber a acusa e dama di lo tin relacion cu un preso den KIA y cu e preso lo tin celular y a comunica constant cu e empleada di servicio “secreto” di Gobierno.
E discusion a bay for di man cu e homber lo mester a maltrata e dama y bay pafor destrui su auto di trabao. Mayornan di e homber a yega na e cas pa papia cune y evita cu e ta sigui pleita den e cas pero no kier a razona.
Su mayornan mes a dicidi di yama Polis pa yudanan papia cu nan yiu. Den e proceso e homber a dicidi di paketa tur su pañanan y den un saco di sushi a hiba nan pafor pa regresa cas di su mayornan.
E kier a bay cu un laptop y e mucha muher mesora a core bay den auto pa kita e computer back for di dje. No ta conoci si den e computer menciona tin secreto nacional di nos pais. Con tal cu Polisnan a papia serio cu e homber y a convence pa e bay for di e cas pa por calma e situacion.
Segun filenan di Polis, no ta prome bez cu ta bay na e mesun adres den Dakota pa atende cu discusion domestico di e mesun pareha aki. Cu e diferencia cu e biaha aki propiedad di pueblo a keda destrui, anto pa un discusion amoroso net riba dia di amor!
