Ki dia lo cuminza pone camara den cruzadanan peligroso of na luz di trafico?
Lema “Faya bo haya” mester keda vigente:
ORANJESTAD (AAN): Awor cu polis a cuminza tene controlnan di trafico mas continuamente lo mester cuminza wak con lo por bin mas lihe cu ta posible cu camaranan den cada luz di trafico pa duna boet na esnan cu ta pasa luz den cora. Ultimamente por a ripara cu hopi chofer ta pasa den luz cora y nada ta ser haci pa evita cu cosnan asina sigui sosode. Cada bez cu un chofer iresponsable pasa un luz di trafico na cora ta poniendo e bida di otro conductornan como di e ocupantenan di otro vehiculonan na peliger.
Na e luznan di trafico na aeropuerto, den oranan di anochi laat, e asunto aki ta bira hopi serio.
Tin chofernan cu ta pasa den luz cora na mas di 100 kilometer pa ora, sino ta mas, locual ta algo cu mester por wordo controla di un manera of otro.
A cuminza pone borchinan, segun entendi, riba camindanan grandi y mas peligroso, pero que hubo cu e camaranan?
Sigur esaki ta algo cu Minister di Husticia Arthur Dowers mester cuminza pensa mas riba dje pa asina evita cu un desgracia sosode.
Na diferente pais caminda tin camaranan instala na e luznan di trafico, manera Merca masha poco biaha un chofer ta comete infraccion manera pasa e luz cora of core cu exceso di velocidad.
Na Aruba tin un free for all y pesey hopi cos ta sosode. E lema “Faya Bo Haya” mester keda vigente y no solamente pa ora tin carnaval.
