Kiosconan cu ningun hende ta opera den e stacionamento publico ta kita espacio pa mas auto!
Ademas di un mal bista cu no ta cuadra cu embeyecimento di ciudad:
ORANJESTAD (AAN) — Den cuadro di e embeyecimento di nos ciudad, tin un observacion y tambe sugerencia pa gobierno, cu ta bin di diferente comerciante cu tin negoshi situa den e vecindario di e terminal di Arubus den Playa. Den e stacionamento publico ubica banda di e terminal di Arubus, tin algun kiosco cu ningun hende ta opera. Nan ta cera y a bira un mahos bista, como resultado di e idea grandioso di Marisol cu no a funciona.
E lugarnan aki ta ocupa un espacio cu sigur na momento cu lo cera Caya Grandi completamente, pa ehecuta e proyecto cu ta andando caba, lo ta necesario pa para mas auto den e stacionamento menciona.
Si kita e kiosconan cu ta desocupa y basta deteriora caba, lo tin espacio pa un cantidad di auto mas.
Tambe a worde observa na nos redaccion, cu e dos lugarnan cu ta habri unda nan ta bende batido, entre otro, kizas por haya un otro espacio tambe. Generalmente, meymey di un parkeo no ta un bon idea pa traha lugar di benta di cuminda, pasobra unda tin hopi auto ta para, riba su mes e ambiente ta contamina.
Tin un bon pida cu tambe mester cambia di cara, un tiki mas pariba di e entrada na e terminal, cu e personanan cu ta trece na comentario aki dilanti, no sa si ta publico of priva.
Pero e ta un espacio cu por worde probecha, por ehemplo, pa muda e dos kiosconan cu te hasta nan ta mas na bista di e publico y unda nan por ta mas comodo tambe.
Si drecha e pida cu ta basta largo y hancho ey, nivele y traha un bunita vloer cu tehel manera e mesun aceranan di Arubus tin, e lo keda mucho mas bunita na bista di nos hende local y nos turistanan, lo conta cu mas espacio, y tambe lo aporta mas lugar pa staciona auto. Sin ni un kiosco riba e terminal por amplia e facilidad cu mas of menos 30 espacio adicional cu aworaki no tin.
Otro aspecto cu a worde menciona ta e bakinan cu tin poni riba acera di e terminal di Arubus na banda y na e lorada di Museo Numismatico, cu ta parce a worde poni eynan pa evita pa mas hende para nan auto unda nan no mag.
Pero e bakinan ta trece un bista mahos. No tin ni un mata planta pero sushi si, tin hende ta probecha pa tira aden. E bakinan aki no ta cuadra cu e proyecto di embeyecimento di Oranjestad, y e area aki unda e parada di bus ta, ta sumamente bishita pa tanto nos mes hendenan cu ta haci uso di bus, como turistanan cu henter dia ta move entre nan lugar di keda y e terminal di Arubus.
