Maria College lo keda na Washington mes
Diasabra otro siman ta cuminsa instala airconan
ORANJESTAD(AAN):E docentenan a dicidi cu nan lo bay keda Centro Juvenil Washington pa asina duna les na e studiantenan di Maria College MAVO. Despues di tabata basta disgusta for di Augustus 2009 unda ex-minister Marisol Tromp no a haci nada, awe e gobierno nobo ta purbando pa kibra hero cu man pa nan keda cla cu e lugar adecua pa e docentenan y muchanan di Maria College. Tabata tin diferente opcion riba mesa desde Dialuna mainta. Te hasta a bay mira e ex-edificio di DOW.
Finalmente esaki no ta necesario, mas pasobra a keda dicidi cu tog lo bay keda na Washington. Minister Dowers a confirma e noticia aki Diamars anochi na DIARIO.
Parce cu e compania cu a gana e destaho lo haya e airconan otro siman diabierna y diasabra mes lo cuminsa cu e instalacion. Ta spera cu tur cos cana bon pa asina e hobennan por haya les na un forma trankil y docentenan tambe por duna les sin ningun tipo di disgusto.
Awor aki mes e proyecto di Maria College ta andando y asina cu e keda cla lo muda bin back playa. E ora ey lo toca turno na La Salle College pa ser renoba.
