Muher bañando na panty y bh a hera worde viola pa desconoci
Esaki a pasa dialuna marduga na Eagle Beach
ORANJESTAD (AAN): Un mucha muher cu a bay landa 4’or di marduga na panty y BH su so den laman a bisa cu un homber desconoci pe lo a bin purba viol’e riba Eagle Beach. Pa mas of menos 4’or y 30 di marduga Polisnan di Noord a bay na altura di Eagle Beach pa un posibel caso di violacion. Eynan a bin topa cu dos mucha homber jong y un mucha muher, tur tres stranhero di habla Spaño. E mucha muher a conta polisnan cu el a bay mira carnaval cu e guynan aki y den oranan di marduga el a opta pa bay landa poco.
El a kita su paña y a bay landa su so na panty y BH. Una bez den laman, e dos “amigonan” a dicidi di haci un chansa cune y a bay cu su pañanan den auto pa dal un buelta y a lag’e su so atras.
Ora el a sali for di laman, el a topa cu un hende homber desconoci pe cu a mishi cune y kier a purba tene relacion cune.
El a resisti y asina e homber a cambia di plan y a baha na awa. Entretanto e dos amigonan a yega back na e sitio.
Securitynan den vecindario a scucha e mucha muher ta yora y menciona cu kier a viol’e, pa cual motibo nan a bati alarma mesora.
E caso riba su mes ta masha straño pasobra ora Polisnan a yega na e sitio a bin topa e trio aki sinta den un di e tentnan di watersport cu un boter di Johnny Walker Red Label whisky riba mesa.
Na momento cu Polis a puntra nan pa nan identifica nan mes, un di e mucha hombernan a cuminsa haci chansa y no kier a duna su adres na autoridad, pa cual Polis a haya nan mes ta papia duro cu e trio aki y a atende nan riba nan comportacion.
A laga nan sa mesora cu nan storia no ta cuadra na nada y ta sinti mas bien cu ta nan cu nan mes a purba viola e mucha muher.
A tuma nan nombernan y mesora e mucha muher a pasa man pa su cup di whisky y a bula den auto cu su amigonan pa por sigui e paranda.
