Diario Online

Nel Oduber su porco sushi ta back

Publication: Wednesday, 10 February 2010. Categoria: Politica

Analisis politico
ORANJESTAD (AAN): Pueblo a castiga e ex pastor Rudy Lampe na un manera cla den eleccion di September aña pasa y e tabata mustra cu e a realiza cu pueblo tabata harta di dje y cu esaki lo tabata fin di presencia di e hipocrita aki. Ta parce cu tur hende a ekivoca nan mes. Ex pastor ta back cu su politica di semper atacando AVP y mustrando atrobe su mentalidad putri. Durante e añanan cu a pasa nos a enfatiza cada biaha atrobe e caracter di e ex pastor aki. Awo cu e a dicidi di bin back nos mester ripiti loke tanto nos a trece padilanti.

Ex pastor Lampe a bira un berguenza pa su religion. Rond mundo semper tin un respet grandi pa hombernan cu ta sacrifica nan bida pa ta sirviente di Dios. Un pastor mester sigui un studio pisa cu ta duna e peso cu mester worde respeta. Pero tambe den e seleccion aki tin error ta worde cometi.

Ex pastor Lampe ta un ehempel di esaki. Casi tur hende rond di dje tambe a yega na e conclusion aki. Pa hopi tempo e tabata activo den MEP, no miembro manera e ta grita, pero activo haciendo e trabaonan sushi pa e dirigentenan di MEP.

Ta pesey semper nos ta ripiti e palabranan di Nel Oduber. Nel Oduber ta un lider cu a dirigi su partido ariba e nivel di mas baho cu por tin. E tabatin un cantidad di fanaticonan di MEP cu tabata haci campaña sushi so. Den e grupo aki ex pastor Lampe tabata.

Su envolvimento den maldad pa MEP a culmina den kimamento di auto dilanti di oficina di gobierno. Ta e ex pastor aki Nel Oduber a yama un porco sushi. Pa hopi tempo ta nan den nan tabata comete un cantidad di cos malo den politica pero asina mes Nel Oduber a yega na e conclusion cu e ex pastor a kibra tur limite di sushedad pa e yame un porco sushi.

Tin hopi palabra a yega di worde usa den politica cu ta nada nechi pero asina leu cu nos ta corda no a worde usa e palabranan porco sushi pa describi nan contrincante politico y sigur no un cu fielmente tabata cu nan pa hopi aña. E caida di ex pastor tabata pa diferente motibo mas.

Durante e añanan cu e tabata den publicidad a resulta cu e ta un gañador patologico cu ta stima su ego y no tin e interes di nos pueblo na pecho. E a yuda hunto cu e dirigentenan sindical e gobierno di MEP pone e castigo di e BBO ariba lomba di nos pueblo. Un peso increiblemente pisa e ex pastor a yuda MEP pone ariba miles di hendenan den nos comunidad cu no tabatin e forza pa carga esaki.

E colmo tabata ora a resulta cu te e ultimo dia den campaña e ex pastor aki tabata completamente mara na MEP pa continua cu e gobierno di MEP si nan dos hunto por a forma un mayoria. E ex pastor tabata asina convenci di su mes ego cu e lo haya suficiente voto pa hunto cu MEP sigui e gobierno cu a tortura nos conciudadanonan.

Mayoria di nos pueblo tabata alivia cu e resultado di eleccion cu a pone cu e ex pastor lo a bandona nos isla y bay biba un otro caminda. Como pastor e no por funciona mas na Aruba y tabata na Obispo pa mira si e lo por a sconde e ex pastor aki un caminda leu for di Aruba.

Aparentemente esaki no a logra cu e consecuencia cu nos tin un ex pastor cu no por actua como pastor mas na Aruba. Bay duna les na hobennan tampoco no ta aceptabel mas ariba nos isla. Pero tampoco gran mayoria kier e back den politica.

Su ultimo hazaña tabata e “overgangs toelage”. E placa cu un miembro di Staten por cobra ora e baha como miembro di parlamento y no ta bin back pa durante un periodo e por busca otro entrada.

E a bringa e ley aki cu tur su forza mientras e tabata convenci cu e lo keda den Staten. Ora cu a resulta cu pueblo a mande cas e a dicidi di cobra e suma aki toch. Mas sin principio no por ta!