Diario Online

Ni na momento cu polis ta controla no tin respet pa leynan di trafico!

Publication: Saturday, 27 February 2010. Categoria: Policial

Den un ora so 51 multa a cay pa pasamento den luz cora:
ORANJESTAD (AAN) — Matutino DIARIO a entrevista Inspector di Cuerpo Policial, señor Ricardo Muller, relaciona cu e control cu ta tumando lugar den trafico. Inspector Muller a comenta cu den oranan di mainta tempran (7’or y pico) ayera, polis a cuminza controla comportamento di automobilistanan den luznan di trafico, specialmente riba hendenan cu ta pasa den luz cora. E trabao a cuminza banda di Aeropuerto, y nan a parti mas of menos 25 multa den tempo cortico, na chofernan cu a pasa door di luz cora.
Tambe eybanda mes a parti 7 multa na hende cu a pasa riba e lineanan. “ Tambe hunto cu mi, mi tabata tin e brigada motoriza y na luznan di trafico na Piet y esnan banda di Marathon, tambe nan a parti un total di 26 multa na chofernan cu a pasa door di luz cora”, Inspector Muller a duna di conoce.

En total polis a parti 51 multa den un ora, pa hendenan cu ta pasa den luz cora, y esey ta mustra cu tog na Aruba ley di trafico no ta worde respeta.

“ Mi mes ta sinta den e auto hunto cu otro polis ta wak, y ora e luz ta cora, cora, eynan nan gewoon ta bula pasa bao di dje.

“ Loke ta orange nos a laga pasa bay pero cora, cora, cu hendenan ta pasa door ta mustra cu nos no ta respeta leynan di trafico aki riba”, Inspector Muller a subraya. Tambe polis a controla velocidad y basta multa a cay caba. Nan a haya un taxi cu unda mester core na 50 kilometer pa ora e tabata core 78.

“ Pues, e ta mustra cu apesar di tur nos esfuerzo y control cu nos ta haci, tog nos ta haya cu hende cu no ta respeta ley di trafico. Hopi biaha ora bo bin cu yen di control, e pensamento di polis ta cu si hendenan sa cu esaki ta tumando lugar, nan ta baha un tiki y cuminza respeta e reglanan di trafico.

“ Pero al contrario, hendenan ta sigui bay manera nada no pasa!” Inspector Ricardo Muller a expresa. El a splica cu ora e volumen di trafico a bira mas slow polis a bay paden pa haci algo otro, y despues a bolbe bay controla velocidad.

“ Mi ta kere cu esnan cu a haya un bon multa, ora nan bay dilanti di Ministerio Publico, nan ta siña. Hopi biaha hende ta siña ora bo kita placa for di nan, mehor bisa, ora bo mishi cu nan cartera.

“ Si esey no ta e caso nan ta sigui pasa den luz cora y viola tur e reglanan di trafico”! Esaki ta e conclusion di Inspector di Cuerpo Policial señor Richard Muller.