No ta importa ken forma parti di Gobierno nobo Hulandes, pasobra AVP semper tabata tin bon relacion cu tur partido
Segun René Herdé,
ORANJESTAD(AAN): Durante conferencia di prensa di fraccion di AVP, lider di e fraccion René Herdé a comenta riba caida di Gobierno Hulandes tambe. El a bisa cu mirando cu den Reino y na Hulanda partidonan ta comparti e idea di un contenido nobo di un reino comun, pa Aruba caida di Gobierno Hulandes no ta bay tin mucho efecto. Pa Antiyas cu ta den un proceso di restructurizacion e por conduci na tardanza. Esaki segun Herdé, kende a sigui bisa cu fraccion di AVP ta spera cu ta solamente un tardanza di e temanan di restructurizacion di Antiyas cu tin hopi aña ta andando, cu nan lo por considere como un ehecucion di decisionnan cu ya a wordo tuma y cu e no lo stroba pa nan yega na e restructurizacion y finaliza esey pa 10 di October.
Lider di e fraccion berde a sigui bisa cu pa su partido no ta hasi mucho diferencia ken drenta e gobierno nobo di Hulanda. El a bisa cu cada biaha cu AVP den ultimo 25 añanan a hereda Gobernacion di MEP, AVP a haya su mes cu situacionnan financiero y economico caotico, cu hopi desempleo y caida di calidad di bida.
“Cada biaha cu cooperacion di nos partnernan den Reino cu e gobierno cu tabata na mando na Hulanda, nos a logra cambia esey”, segun Herdé. Gobiernonan na Hulanda tabata entre otro partido PvdA, cu segun MEP ta nan amigo. “Nos a goberna perfectamente cu PvdA”, segun Herdé.
Tabata tin un tremendo relacion entre Prome Minister Henny Eman y Prome Minister Wim Kok di Hulanda.
AVP tabata tin un tremendo relacion tambe cu Biesheuvel di CDA y tambe cu Balkenende.
E relacion cu D66 tambe ta bon. Si bo goberna bon, otro partinan di Reino lo ta dispuesto pa traha cubo.
