Pader Szpila ta splica kico diaranzon di shinishi ta nifica
Tempo di Cuaresma a cuminza ayera:
“Un oportunidad cu Dios ta duna nos pa cambia nos bida”!
ORANJESTAD (AAN) — Un cantidad grandi di feligres Catolico, a acudi ayera, Diaranzon di Shinishi, cu ta cuminzamento di Cuaresma, na Misa pa tuma e Cruz di Shinishi na frenta. Pero kico realmente tumamento di shinishi ta nifica? Nos redaccion a tene un entrevista cu nos Vicario General Pader Daniel Szpila, ken ademas ta e Sacerdote encarga cu e Parokia di Dakota, esta Birgen di Fatima, pa trece dilanti un splicacion tocante e ceremonia aki.
Pader Szpila a splica cu Diaranzon di Shinishi su nificacion ta bin for di Santa Escritura, specialmente den Buki di Jonas cu ta conta con e pueblo di Nineveh tabata den un desorden moral y Dios kier a tuma e decision di destrui e ciudad y henter su poblacion.
“ E ora ey El a manda tog, un profeta cerca nan pa wak si nan ta cambia di bida y ora nan a tende e mensahe di e profeta nan a sinti duele di nan actonan, di nan bida robes y nan a tuma e decision di cambia di bida y como señal di esaki nan a tapa nan cabes cu shinishi, pa humilia nan mes dilanti di Dios.
“ Nan a bisa cu realmente nan a peca y cu nan picanan ta manera shinishi cu ta tapa nan, y nan a pidi pordon y misericordia. Asina pues, e signo di shinishi ta bin di e historia ey y otro historianan semehante di e Pueblo di Dios, cu nos ta mantene den nos celebracion Liturgico.
“ Nos tambe ta hende cu ta faya, cu ta peca, cu ta dual, cu ta bay camindanan robes, y awe, marcando nos frenta cu shinishi nos kier reconoce esaki. Nos kier bisa Señor Dios cu nos ta sinti, y cu nos tin duele sinceramente, cu nos a bay camindanan robes, y cu nos kier cambia nos bida.
“ Pues e Cruz di shinishi riba nos frenta ta un manifestacion cu ‘mi kier cambia mi bida; mi kier drecha loke tabata robes.
Y Cuaresma ta un gran oportunidad pa cada un di nos, pa nos recupera nos bida; e bida cu door di diferente circunstancia a keda sofoca, den ansia, talvez ansianan materialisma cu a bay den abismo di dualidad, sin sentido, un bida cu a cuminza diriti, den cosnan totalmente robes, cu a cuminza destrui locual tabata tin berdadero balor: manera e balor matrimonial, e balor familiar, balor di amistad, etc., pues un gran oportunidad cu Dios ta duna nos pa nos recupera nos propio bida y e balornan berdadero cu ta haci nos bida resplandece y feliz; pa nos recupera e comunion cu Dios, cu ta fuente di felicidad, di amor, di bida.
Comunion cu Dios cu por devolve nos armonia, nos paz, cu por mustra nos un caminda sin dualidad, sin ansiedad, un caminda cu lo conduci nos na plenitud di bida. Ohala nos por probecha e cuarenta dianan aki, pasobra haciendo esaki, nos lo goza sin duda cu un gozo incomparable, cu lo keda transmiti tambe den nos ambiente, nos famia, nos matrimonio, estableciendo, restaurando, tur e ruinanan cu tabata pisa riba nos”, Pader Daniel Szpila a expresa.
