PARLAMENTO: LEGISLACION OF OFENSA?
For di e momento cu e partido geel a haya un MEP di 12-8 for di Pueblo, hopi di su integrantenan a perde cabez y ta confundiendo nan mision den oposicion cu e tarea baho di ataca y ofende nan contrincantenan di e manera mas personal y repudiable posible. Hasta Parlamento ta ser irespeta cu un lenguahe vulgar inaceptable. E ultimo incidente cu Booshi a provoca ora cu el a ofende e mama di Juan David, casi a caba den un confrontacion violento cu den nada ta sirbi Aruba o su Pueblo.
E tabata completamente innecesario y di hopi mal gusto. Ademas, na lugar di crea un ehemplo digno di ser sigui pa otronan, el a demostra cu den politica tin esnan cu no por adapta nan mes na e situacionnan di normalidad cu Pueblo ta exigi di su mandatarionan. Parlamento no ta un bar; e ta un recinto di legislacion, unda cerebro y pensamento mester predomina riba pasion y violencia. Den situacionnan asina ta mas notable e ausencia di un lider cu por a pone ordu y disciplina riba su compañeronan di partido.
Pa usa e incidente ey como un excusa pa ataca e Presidente di Parlamento como un persona debil o cu no por pone e control rekeri, ta hopi temerario! Andy Lee ta un politico di hopi integridad! Su conocimentonan y firmeza di caracter ta mas cu suficiente pa yude crea e ambiente di trankilidad adecuado pa debatenan productivo riba e proyectonan di Ley den preparacion o discusion.
Sinembargo, ningun hende den su sano huicio por exigi di dje eherce control riba politiconan mañoso cu nunca a demostra otro caracteristica cu esun di ataca, ofende y insulta nan contrincanenan manera nan ta haya ta bon. E ta un compulsion incontrolable den esnan cu no tin ningun clase di dominio riba nan emocionnan. Na lugar di mehora, nan ta bay empeorando cu tempo.
Juan David, un persona hopi trankilo, no tabata tin pakico acepta e groserianan di Booshi o di cualke otro politico di oposicion. Su reaccion ta comprendible, pasobra no ta tur hende ta dispuesto di djis ignora ofensanan contra nan mamanan.
Ta di spera cu e tipo di incidentenan aki no ripiti, ya cu di mes Parlamento no ta conta cu demasiado admirador. Dia cu tur e miembronan di dje compronde e esencia di nan trabao como representantenan di Pueblo, y por comporta nan mes di acuerdo, Aruba lo por bati riba su pecho cu e tin un organo legislativo di categoria!
Mr. Yes
Wel, mi ta keda cu nos mester keda etico si. Aunke ken cu nos ta of no trankil of no corda cu bo no ta canja pueblo bo ta canja bo mes.No tin mihor castigo cu Bo conshenshi, si Bo tin! Ban goberna manera adulto y parlamentario educa. Corda boso ta cara di pueblo y ta nos a pone cada un di boso eynan. Aunke no ta tur merece di ta eyden!
DG Kelly
Mi idea ta pa bin cu un ley di ordo(disciplina) pa parlamento;
e respet pa e ser humano mester ta central, ken cu ofende y vooral bai rumbo di mayornan of miembronan di famia di un politico of un ex-politico, mester wordo castiga y mester actua cu boet.
** Prome biaha;
bo ta entrega 60% di bo salario na final di luna y bo ta keda geschorst pa 2 siman di trabow. Alaves bo partido ta perde e derecho y sosten di bo voto cual lo hasi cu e partido lo debilita den sosten.
** Si bo faya un di 2 biaha;
bo ta entrega 2 biaha 100% di bo salario ricibi e ultimo 2 luna nan na fin di luna y bo ta keda expulsa di bo trabownan pa cu e organo legislativo mas halto di nos pais. Emiembro nobo cu bin na obo lugar ta keda cu votonan blanco pa e resto di tempo te ora cu bin elecshonnan nobo pa parlamento, cual ta hasi cu e fracshon di gobierno ta debilita te ora cu bin elecshon nobo.
Dr. Jorge López Dorado
Un persona incapaz di pensa mantené un idea cu argumento intelectual no por aportá nada constructivo en un parlamento cu ta representa un pueblo respetuoso y digno. Un persona agresivo, sin control y sin manera mester busca un oficio diferente.
Manolo
E calidad di oposicion cu partido MEP a desaroya den e ultimo tres luna ta algo di lamenta. Un pobreza total di idea, un incapacidad absoluto pa conecta cu opinion den comunidad y awor, pa colmo, un comportacion di salvahe. Tur esaki ta un iresponsabilidad cu nos pais y un pesimo servicio na nos democracia.