Prome Minister Eman a yuda re-establece un bon relacion entre Hulanda y Aruba
Segun René Herdé,
ORANJESTAD(AAN): Durante conferencia di prensa di fraccion di AVP, lider di e fraccion René Herdé a trece dilanti cu e contenido cu AVP kier duna Reino ta pa tin metanan comun cu ta na beneficio di Hulanda, Antillas y Aruba. Nos mester tin metanan comun riba tereno di seguridad, defensa, calidad di salubridad, calidad di enseñanza y riba tereno di bon gobernacion. “E temanan grandi ey ta hasi cu nos como Reino ta haya caracteristicanan comun, apesar di e diferencianan di distancia, apesar di diferencianan di cultura, incluyendo cultura politico”.
Esaki segun Herdé, kende a sigui bisa cu ora bo tin metanan comun cu ta garantiza trankilidad seguridad, stabilidad y progreso riba tereno di enseñanza, salubridad, social y vivienda, den Reino bo ta reconoce y hunto bo ta halza e nivel di tur hende, di tur parti di Reino.
Durante e conferencia di prensa lider di fraccion di AVP a bisa cu e ta invita tur hende pa subi riba e website-nan di partidonan politico di Hulanda, pa wak con mas y mas nan ta crece bay den e mesun idea di metanan comun.
“Nos ta contento cu despues di tanto aña cu nos ta vocifera esey via Mito Croes y Henny Eman entre otro, Hulanda tambe ta pensando den e mesun direccion”.
Esaki segun Herdé, kende a sigui bisa cu e ta contento di wak con Prome Minister Mike Eman a haya un bon acogida na Hulanda, unda el a logra restablece un bon relacion entre Hulanda y Aruba.
