Pustamento riba caminda di Mahuma-Aeropuerto ta na orden di dia
ORANJESTAD (AAN): Un di e otro aspectonan cu polis mester duna atencion na dje ta e hecho cu riba caminda di Mahuma-Aeropuerto den oranan di anochi tin pustamento ta tuma lugar bay gol.
Aunke polis ta kere cu solamente na Sasakiweg esaki ta tuma lugar, riba e caminda aki sonidonan hopi duro di tire ta wordo scucha den e becindario. Riba e caminda aki tambe algo mester wordo haci. Tin un grupito di muchanan jong cu te hasta nan ta core sin rijbewijs, sin seguro, sin keuringskaart, sin ningun documento legal.
E ruta aki ta masha conoci como un caminda peligroso y ya caba for di e luz di trafico na aeropuerto por ripara con nan ta primi trot y ya na altura di Mahuma nan a alcanza un velocidad hopi halto mes.
Na Sasakiweg a laga pone material special pa controla velocidad pero por ripara cu esaki no ta wordo respeta. E material cu a ser poni eynan no ta yuda pa bah velocidad. Ora cu e chofer ta casi te na e rotonde mes ta ripara cu el a pasa riba algo, pero pa baha velocidad prome cu yega na e rotonde? Wel, no.
Pesey mes mester busca algo mas eficaz y no kere cu e cosnan chikito aki ta bay pone un chofer cu ta core iresponsable baha velocidad.
Aunke DOW a laga sa cu nan lo ta trahando pa trece algo structura pa soluciona e problema aki cu e camindanan peligroso, di loke si nan mester ta sigur ta cu esey lo mester ta algo cu en berdad ta traha y cu ta algo duradero.
