Home General Region na peliger pa grupo di Haitianonan cu kier un Chavez of...

Region na peliger pa grupo di Haitianonan cu kier un Chavez of un Fidel na nan pais!

0
0
SHARE
- Advertisement -

Grupo a cuminza lanta na Haiti cu ta pidi un lider manera un Chavez of un fidel
ORANJESTAD (AAN): Tur hende por corda di e famoso cancion ♫“We are the World”….we are the children♫. E cantica aki a ser skirbi na 1985 pa Michael Jackson (qepd) y Lionel Richie y produci pa Quincy Jones. El a wordo interpreta pa un grupo di artistanan bao di e nomber “USA for Africa” cu e meta pa recauda fondo pa e personanan cu tabata muriendo di hamber na Africa.


E cantica aki a resulta un exito total den e mercado musical mundial y a recauda miyones y miyones di dollar. Pero con a para cu e placa recauda? El a yega Africa pa cumpli cu e meta inicial di yuda e africanonan?

Awor e mesun productor cu ayudo di Lionel Richie a haci un remake di e cantica aki, e biaha aki canta pa un otro grupo di artistanan famoso cu e meta di yuda e damnificadonan di e teremoto na Haiti.

E cantica aki cu dia 12 di Februari lo ser lanza mundialmente durante e apertura oficial di e Winter Olympics 2010 lo ta un otro forma pa yuda mercadea un producto musical of en realidad e lo worde encamina pa yuda un bon causa?

Diferente lector a yama redaccion di DIARIO y ta puntra si e placa aki en berdad lo yega su destino? Esnan cu tin hamber y cu no tin cas na e momentonan aki na Haiti lo worde alivia den nan tristeza y desesperacion?

Banda di esaki DIARIO ta hayando diferente reaccion den e dianan aki relaciona cu e hecho cu e ayudo humanitario a yega Haiti for di tur skina pa yuda esnan damnifica. Pero loke por ripara tin duda riba dje ta si e ayudo aki ta worde encamina di e manera corecto, ta yegando na unda e mester a yega of no ta yegando suficiente.

Cada dia e noticianan internacional ta confirma con e haitianonan ta bibando den desesperacion. E muhernan y e muchanan, principalmente ta esunnan cu mas ta sufriendo. Nan ta birando victimanan di abusonan, den tur sentido.

DIARIO a haya sa cu hopi di e muhernan aki ta worde ataca door di nan mesun hendenan pa nan entrega nan bon di cuminda. Bonnan cu nan mester a cumpra y cu mester ta gratis.

Nan mester entrega esaki den man di e malhechornan pasobra nan lo core e riesgo di worde maltrata fisica of sexualmente. Te hasta nan ta coriendo e riesgo di worde tira mata manera ta e situacion cu e muchanan cu a logra sobrebibi.

Otro informacion cu nos ta dispone ta cu hopi oficial cu ta parti cuminda ta cobrando $7 dollar pa porcion di cuminda. Algo inaceptable teniendo na cuenta cu hopi ayudo internacional a yega Haiti.

E siman aki, un grupo di haitianonan a tira mata un guardia di seguridad para dilanti di un banco. E grupo kier a bay cu placa eynan pa nan por a cumpra cuminda, pero nan no a midi e consecuencianan ni dañonan!

Pa colmo, tin observadornan cu tambe a duna di conoce cu awor a resulta cu na Haiti tin un grupo di haitiano cu kier pa nan tin un Chavez of un Fidel como lider na nan pais.

Kico un cos asina ta nifica pa nan pais, nos region? Pakico Haiti mester bira manera Cuba?
Na Centroamerica mes y diferente otro pais nan ta rechazando totalmente tur sorto di comunismo.

Na Costa Rica, caminda tabata tin eleccion presidencial ayera, e ciudadanonan ta boga pa un cambio pero no na fabor di esnan cu ta wak pa nan interesnan, bira rico mientras e pueblo, esnan mas vulnerable ta sufri.

Ta di spera cu Haiti por sali mas pronto posible di e situacion dramatico cu nan ta bibando aden.
Ta conoci cu e reconstruccion di Haiti no lo dura tiki pasobra e realidad ta cu e lo dura hopi aña. Pero ta di spera cu e fondonan cu a ser manda for di tur parti di mundo, incluyendo Aruba, por yega na unda tin necesidad.

Esnan cu a sobrebibi na e teremoto di Haiti no mester muri di hamber. Placa tin y e recursonan tey. Awor mester vigila pa nan worde usa adecuadamente y no keda den saco di intermediarionan of hendenan sin escrupulo cu kier saca probecho for di un situacion di desastre y calamidad.

- Advertisement -

DUNA COMENTARIO

Please enter your comment!
Please enter your name here