Ritz Carlton no a haya ningun “Tax Holiday”
Prome Minister a declara:
Marriott: Gobierno lo haya un contribucion sigur di 10 miyon dollar pa aña!
ORANJESTAD (AAN): Bill Marriott a referi durante e conferencia di prensa na Bestuurskantoor na un contribucion di sigur 10 miyon dollar pa aña den caha di gobierno desde 2015.
Durante entrevista cu Prome Minister Mike Eman a puntre di con el a expresa esaki y si tin cualkier acuerdo te cu 2015.
E mandatario a indica cu e ta kere cu Sr. Marriott ta papia di ki ora nan ta bay cuminza gana placa pa paga belasting.
E grupo aki no a haya ningun “tax holiday”. E unico cos cu ta existi ta e IPC cu ta existi pa tur hotel na Aruba. Esnan cu yega riba 200 dollar di un revenue per available room tin un tarifa di winstbelasting special y esey ta conta pa tur hotel cu logra esey, a señala.
Sigur cu Ritz Carlton lo logre, a agrega, pero asina mes nan lo mester paga impuesto. Kico cu nan importa pa construi e hotel nan tin cu paga impuesto riba dje.
A puntra gobierno si nan a tene cuenta cu un cambio di locacion, manera entre otro bay Bushiri y tuma e area aki over.
Segun Premier Eman, nan a purba esey, a papia cu propietario di un hotel pa mira si nan ta dispuesto pa combersa cu e hendenan di Ritz Carlton.
Nan a worde priminti cu esey lo a sosode pero na final no a logra debi na e gastonan envolvi cu tabata mucho grandi. No por a yega na cambia nan pensamento di e locacion ey y tabata mara legalmente pa esey, a indica.
E hecho cu Ritz Carlton ta bin awor, na e momentonan economico cu mundo ta pasando aden, e dolor en todo caso ta worde suaviza door di e hechonan ey, Sr. Eman a declara.
