Royal Resorts ta bay maneha Aruban Resort
Y general manager ta Angelina Galiano
ORANJESTAD(AAN): Na The Aruban Resort tabata tin un acto oficial unda a anuncia reapertura di e dicho resort Diahuebs. Presente tabata tey mas cu un minister y parlamentario. John Cole a hiba palabra y el a splica con nan a cuminsa e proceso mas cu un aña pasa den corte pa tuma over e control over di e hotel. Segun Cole, for di mas di un aña pasa el a acerca abogado Milly Schwengle, pa wak kico e lo por hasi, mirando cu el a wak e problemanan di e resort birando mas grandi.
Cole a sigui bisa cu a cuminza un caso di corte y dia 10 di December el a ricibi veredicto di un huez kende a kita control di e resort for di mannan di KL International y pone den man di algun curator.
“Nos a yega akinan cu sosten di Gobierno di Aruba, e propietarionan cu a contribui cu esey y e empleadonan cu a sigui traha sin ricibi pago pa casi dos luna”, segun Cole.
El a sigui bisa cu e ta spera cu futuro lo ta briyante pa tur envolvi den e hotel. Cole a tuma e oportunidad pa gradici e diferente ministernan envolvi y miembronan di parlamento.
El a bisa cu den su bida el a conoce hombernan grandi y un di e hombernan mas grandi cu el a conoce recientemente ta Minister Otmar Oduber.
Minister Oduber ta un ehempel di e gobierno nobo di Aruba cu ta bayendo hunto cu pueblo di Aruba pa hopi bon temponan. “Nan actitud y nan sosten a trece nos unda nos ta”, segun Cole.
El a sigui bisa cu riba 22 di Februari ta bay tin un reunion general den cual lo wordo anuncia cu su grupo ta bay reemplaza e hunta di directiva di e resort.
Cole a bisa cu Diahuebs mes el a ricibi carta di retiro di tur esnan cu tabata riba e hunta existente.
El a bisa tambe cu mirando tur e desaroyonan aki, e ta kere cu e resort ta bay habri pronto, unda cu lo por aloca algun di e miembronan den e hotel.
Intencion ta pa dentro di dos siman cuminza laga e huespednan bin keda den e hotel y speranza ta cu e hotel lo prospera. Mirando e presupuesto hopi limita, e operacion ta bay cuminza poco poco.
Na comienzo ta algun trahador lo ta trahando y cada biaha mas lo drenta bek den servicio.
Mas liher cu por trece hende pa keda den e resort, mas lihe e resort lo por crece bek y asina mas empleado lo por haya nan trabao bek.
Cole a splica tambe con el a selecta un otro compania di maneho. El a studia diferente opcion y el a escoge ‘Royal Resorts’. Royal Resorts ta e management company cu ta maneha Cost Linda.
Cole a splica cu el a keda impresiona pa e trabao di e staff di Royal Resorts y mas di nan miembronan.
Tur hende na Costa Linda ta satisfecho pasobra Royal Resorts ta hasi un bon trabao.
A papia tambe riba ken ta bay bira general Manager. A entrevista diferente hende y e general manager nobo ta bay ta Angelina Galiano.
