Staff di WEB tin cuchio na garganta di gerencia
Trahadornan normal cla pa acepta CAO nobo pero…
ORANJESTAD (AAN): Pa algun dia caba tin reunionnan andando entre SIWA y gerencia di WEB pa e CAO nobo. Tur cos tabata canando bon y e miembronan segun informacion tabata aceptando loke tabata e proposicion cu tin. Tur hende ta compronde cu e situacion pa WEB tambe ta mesun dificil cu cualkier compania. Hopi awendia ta prefera di keda cu trabao cu bay pone e compania tuma un decision cu mayan por laga algun di nan mes riba caya. Pa colmo cada biaha cu awa subi of coriente e trahadornan aki tambe ta ser ataka fuertemente.
Ora cu e miembronan di SIWA y gran parti e trahadornan normal riba field ta cla pa CAO keda concretiza a presenta un problema. E trahadornan den staff di WEB ta oponiendo fuertemente cu loke tin riba mesa.
staff ta exigiendo aumentonan drastico cu a pone tur cos on hold segun informacion.
E clase media den WEB mes a compronde e situacion y awor staff cu ta gana hopi placa a pone cuchio na garganta di e director.
Ta kico esaki ta anto? Pakico mester abusa di e director di WEB? Unda boso kier hiba WEB como staff? Boso como staff tambe mester compronde cu e situacion ta malo pa tur hende.
Si WEB duna un aumento asina drastico na final ta e cliente cu ta e pueblo mester bay paga pe. Ya caba e awa y coriente ta caro. Asina boso como staff tin e pueblo na pecho? Foei. Stop di exigi y pone presion riba e director.
Lo ta bon pa sa si e presidente ta acepta tipo di miembronan asina cu ta daña pa e chikitonan.
DIARIO lo busca un manera di haya e director di WEB pa papia cune awe y tambe e presidente di SIWA pa caba di confirma loke cu ta pasando.
E noticia aki a bin for di un bon fuente. Pues no mester bay sconde awor tras di ningun storia.
