Diario Online

Ta bay cuminza duna boet, sin cu e propietario di auto mester ta presente

Publication: Saturday, 27 February 2010. Categoria: General

Segun Minister Dowers,
ORANJESTAD(AAN):– Durante un entrevista cu Minister di Husticia Arthur Dowers, a puntre riba implementacion di cierto leynan di trafico y cierto cambionan cu ta bay bin. El a bisa DIARIO cu a palabra cu lo bay implementa e leynan manera cu nan ta formula na e momentonan aki.  Por ehempel e controlnan di trafico ta bay wordo hasi unda cu e chauffeur no mester ta presente pa e haya un boet.  Na momento cu polis constata cu un auto ta violando cualkier ley di trafico bo lo haya un boet.
Si por ehempel bo ta mal para etc. Tambe ta asina cu si polis wak bo ta pasa den luz cora, no necesariamente e tin cu parabo pa dunabo e multa.  E por simplemente registra bo number di auto y despues bo lo haya e multa pa e infraccion cu bo a comete.

Si propietario di e auto indica cu ta otro hende tabata coriendo su auto, e mester bin cu e prueba e ora ey y e persona mes cu tabata coriendo e auto lo haya e boet.

Minister Dowers a bisa tambe cu ora un auto ta mal staciona un caminda, e lo haya un multa y polis por dicidi di bay cu e auto.

Banda di paga e multa e ora ey, e persona lo tin cu paga tambe e gastonan di polis cu a tow e auto.
Ta bay uza e posibilidad den ley tambe pa pone e autonan cu hopi tempo no a wordo busca pa nan doño,  na vindishi.

Polis no por keda tene e autonan pa un periodo indefini,  sin cu Gobierno ta haya algo bek pa esaki.