Home General Traha un baki den patio yene cu awa y cria pisca!

Traha un baki den patio yene cu awa y cria pisca!

2
0
SHARE
- Advertisement -

Opinion publico:
E burla flagrante di un presidente loco y sin escrupulo pa combati pobreza!
ORANJESTAD (AAN) — Ta increible con un sala yen di hende bon bisti, tanto hende muher como hende homber, ta sinta aplaudi tur e barbaridadnan, cu e presidente di un pais bisiña di nos, a expresa den su discurso mas reciente, dilanti un grupo di hoben recien gradua. Con ta posible cu tin hende ta acepta un burla flagrante cu el a haci no solamente di esnan menos afortuna na su mes pais, pero di tur e pobernan na mundo!


Locual pa e ta un briyante idea pa combati pobreza, ta un bofta na cara di tur hende cu ta pasa hamber, ora cu el a anuncia con su gobierno ta resolve e situacion di hamber, consehando tur esnan cu ta keha cu no tin nada pa come, pa traha un baki den e patio di nan cas (si ta cu nan tin cas anto), yene cu awa y hinca cantidad di pisca, e ora ey cada bez cu e famia tin hamber, ata nan tin pisca na alcance di man, pa nan come!

Y no ta un joke el a haci. Cu cara serio el a bisa cu esaki ta “economia domestico” bon pa e economia di tur pais, anto e ta exporta su idea tambe na henter mundo!

Tristo! E ta un burla sigur na un pueblo unda tin scarcedad di electricidad y di awa potable. Lo ta e hendenan mester traha un regenbak y warda te awacero cay pa e yena anto cria e piscanan aden. Pasobra loke ta awa potable, e mayoria di pueblo no tin!

Un locura total e meneer ey a papia. Tempo cu el a sinta e tabata cana cu un Bijbel y e tabata uza den su discursonan demagogo e Palabra di Dios y segun’E e tabata un gran Cristian, y tabata nombra “Jesus aki, Jesus aya”.

Awor el a duna un birada di 180 grado. El a bira ateo mescos cu Fidel, y no ta Dios a traha e ser humano, pero ta Darwin tin razon: hende tin su origen den e macaco; no obstante, Dios a nace na Venezuela y ora tin secura e ta yame: “Dios manda mi awa, y awacero ta bin!”

Y e no ta cansa di mete den e politica di otro paisnan. El a declara cu e presidente di Honduras cu e pueblo a caba di elegi cu voto popular, ta ilegal. Djis pasobra e persona aki ta un democrata.
Y pa colmo e ta yame golpista. E hendenan cu a sinta scuche yena un sala ta aplaudi su locuranan, pasobra un hende cu cinco sinti, ciudadanonan conciente di un pais, hamas lo por lubida cu e presidente ey ta un golpista.

Con hendenan por aplaudi un presidente cu ta expresa cu tanto sarcasmo y violencia. Esaki ta su tono constante di agredi su mesun ciudadanonan, pero ni un hende ta haci nada, ta parce cu esnan cu ta conciente di loke nan pais ta bibando a “give up”, posiblemente door di mira un grupo grandi tras di e presidente cu sigur tin hopi cos ta haya di dje, pa nan sigui apoy’e, y cu no mester bay traha den patio di nan cas, un baki pa yena cu awa y cria pisca pa nan y nan famia come (esta, un corupcion!).

Mientras tanto, publicamente nan presidente ta mustra con bon e ta come barica yen!!
Ta un lastima cu el a duna e discurso aki dilanti un grupo di hoben recien gradua, cu tabata scuche manera robot, cu boca habri (bon adoctrina caba) pero sin ningun expresion di emocion riba nan cara.

E homber a papia promoviendo un sistema comunista y menazando otro studiantenan cu ta manifesta contra su regimen. Anto, pa nan sa kico ta spera nan! Ki horor! Awor e ta hincando su mes den e futuro eleccion presidencial na Brasil, unda cu ya caba e ta ordena e pueblo Brasilero pa nan no vota pa un democrata!

E meneer aki tin brio! Pero sigur su cabes no ta bon y cada dia ta bira mas loco, pero mas loco cune, mas sinberguenza, ta e grupo di chupador y oportunista cu ta prefera pa e mayoria di nan conciudadanonan muri den man di hampa, di criminalnan cu ta mata pa un par di keds, di un parti di e militarnan cu a perde tur respet y dignidad propio pa cay den corupcion, na luga di bisa “ya basta! Ban caba cu e regimen dañino aki” y ban construi e pais di nobo, riba e basenan di democracia y kibra cu e doctrinamento di nan propio yiunan (cu kizas den e intimidad familiar nan mayornan ta laga nan sa con loco nan presidente ta), y di tur mucha y hoben inocente, cu na dado momento lo mester tuma e rienda di nan pais.

Pero tur tirano ta cay pa su propio peso y sigur e presidente ey lo no sinta pa semper, maske e ta pretende di ta “inmortal” (aunke inmoral si e ta) manera practicamente el a declara den su discurso mas reciente e fin di siman cu a pasa.

- Advertisement -

DUNA COMENTARIO

Please enter your comment!
Please enter your name here