Trahadornan di P.N.A. a tene accion di protesta ayera!
Wardando añanan riba nan posicion laboral:
ORANJESTAD (AAN) — Ayera mainta un grupo di trahador di Parke Nacional Arikok a para trabao como accion di protesta debi cu nan tin entre 8 cu 5 aña, wardando riba nan posicion y escala di salario. DIARIO a entrevista sr. Jan Eckmeyer, vocero di e grupo, ken a splica cu e accion di protesta a dura un ora largo, pendiente di un contesta di e minister concerni (Hooiboer- Winklaar), prome cu ayera atardi. Den caso cu esey no sosode nan lo bolbe tin un paro awe mainta.
E motibo ta cu nan tin entre cinco cu ocho aña wardando riba nan vevordering y estructura di salario, ademas di un “pay back” cu nan mester haya.
Pero den tur e añanan aki e gobierno anterior a bira e asunto pa nan di tur manera, y nan a papia cu e mandatario nobo, cu a bisa cu e ta bay yuda nan, y riba esey nan ta sigui warda.
“ Aworaki si, awa a pasa hariña y nos ta wardando wak si nos por haya un contesta pa awetardi”, Eckmeyer a duna di conoce ayera mainta.
Sr. Eckmeyer a señala cu e trabao cu e rangernan ta haci ta nada facil, incluso pa nan mes no tin suficiente seguridad, y tin cosnan ta pasa patras di e parke cu nan no ta desea pa sosode cu ningun hende.
“Esaki ta haci cu nos como trahador a bisa cu nos tin ocho aña ta sinta akinan ta warda. Nan a bisa nos pa warda cien dia. Cien dia bo no por compare nunca cu ocho aña, anto nos ta purba di wak con nos por yega mas cerca di minister pa wak si nos por papia cune”, Eckmeyer a subraya.
El a subraya cu den cien dia gobierno por a papia cu esnan di Postkantoor y cu Polis, anto di con esnan di PNA, mester warda despues di cien dia? “Nos no por para pa otro problema cu no ta nos a haci. Esey ta e problema pa cual nos ta para aki afo awendia”, el a expresa.
El a agrega cu ayera mainta den un reunion, nan a bin tende cu nan papelnan mester bay bek, pero awor no ta pa D.P.O sino pa P&O, locual e trahadornan ta puntra ta di con, si e no ta nan fout. Nan no por warda di un pa tres aña mas, pa un total di diez aña anto, locual nan ta haya ta basta!
El a agrega cu tur e trahadornan a busca nan diploma y tur otro papel concerni y a entrega nan D.P.O, y prome cu e gobierno anterior a baha, nan a laga sa cu tur cos ta canando su caminda.
Pero awor cu gobierno nobo a sinta, nan a bisa esnan di P.N.A, cu nan a haya un bulto di papel, pero diripiente e papelnan no ta bon y nan ta mal traha.
Nan no ta compronde, segun sr. Eckmeyer, di con si nan tin diez experto a traha riba e proceso na D.P.O di e diez expertonan ey no ta bon?
“ Anto, nan no sa nada di ni un di e trahadornan aki den. Nan no sa kico ta pasa aki den ni kico nos trabao ta come y bebe. Kiermen, esun cu ta bay traha riba e papelnan aworaki ni sikiera a bin puntra kico nos ta haci y kico nos trabao ta aki den.
“ Kiermen, esaki ta bay bira un proceso di basta aña atrobe. Pues, bay warda atrobe? Mi kiermen, ta suficiente!” Eckmeyer a bisa.
El a agrega cu nan ta afilia na sindicato SEPPA, pero cada bez cu nan ta yama e sindicato nan ta bisa nan pa “warda, warda y sigui warda”. Pues, a yega momento cu e trahadornan no por warda mas, e trahadornan ta hopi cansa y sumamente disgusta.
“ Nos ta traha hopi disgusta, pero nos ta bin na trabao si. Nos no ta keda sin presenta na trabao, pero nos ta traha sin smak, pasobra e asunto aki tin añanan ta wardando”, sr. Eckmeyer a subraya.
