Turista Colombiano a pasa anochi den “suite policial”
ORANJESTAD.(AAN); — Ultimo tempo guardianan di seguridad encarga cu vigilancia y seguridad di bishitantenan tin basta trabao.
Tin bishitantenan cu no por controla nan mes ya cu entre otro nan ta bebe di mas y otronan tin comportacion cu ta laga di desea.
Tabata den oranan di marduga guardianan di seguridad a solicita asistencia relaciona cu un huesped na un high rise hotel.
Segun e yamada cu a drenta na central di polis, den sistema di Actpol, esaki a keda registra pa 1’or mas 34 minuut. di marduga.
Patruya a wordo dirigi mesora na e high rise hotel y na yegada polis a wak guardianan di seguridad cu tabatin un persona teni pa evita cu e por baha bay.
Segun informe suministra na e agentenan, e bishitante a scop diferente borchi y su actitud ta inaceptable y ademas e ta bao di influencia di alcohol y riba dje e tabata masha agresivo.
Hasta guardia el a dal den cara, segun a ser notifica na polisnan y e tipo kier a core bay, pero nan a tene te ora cu patruya di polis a presenta.
E homber agresivo tabatin poco rasca na curpa y guardia envolvi no a desea di entrega keho contra e homber agresivo.
Tabata trata di e hoben Colombiano inicialnan N.M.G. di 23 aña.
Polis a detene y transporte pa warda, unda fiscal auxiliar a dicidi di encarcela pa su seguridad y pa seguridad di otro.
Asina tambe e huesped cu ta drumi na grandi den airco cu tur facilidad a haye ta drumi tras di bara di hero.
