Home Editorial UN MINISTRO DI HUSTICIA CAPACITA!

UN MINISTRO DI HUSTICIA CAPACITA!

6
1
SHARE
- Advertisement -

jossy_mansur_picDespues di a mira e actuacionnan di e rumannan Croes como Ministronan di Husticia alternando den e posicion ey den varios ocasion, ta un alivio nota cu awor Aruba tin un Ministro di Husticia capacita y decidido! E par di comentarionan adverso na su maneho, procedente di un parlamentario di MEP, ta insignificante, ya cu nan no tin nada di haber cu e decisionnan cu e Ministro a tuma y lo sigui tuma, segun su consenshi y conocimentonan di Ley. Pa evita cu e neishi cu MEP a traha na Macuarima sigui ta un centro di tal departamento bao e insignia di e partido perdedor, Arthur Dowers corectamente a instrui e deurwardernan pa di awor padilanti atende e asuntonan cu ta relaciona cu Gobierno na e sede di e mandatarionan, o sea Besturrskantoor, cu AVP a rescata di olvido y decadencia pa convirtie un biaha mas den un berdadero centro gubernamental.

Cu un eror di procedimento o di forma por a ser cometi den e proceso no ta nada di gaba o haci politica cune. Ta hendenan cu tin tur tempo di perde so ta inverti esun di nan den pikimento di pieu, na lugar di repasa e erornan grave cu tio y tata a comete den pasado for di e mesun posicion ey! Si tin mester di recordatorionan, please acudi na DIARIO y nos lo complace sacando di nos archivonan e barbaridadnan cometi pa e pareha Croes.

Por bien ta cu algún hende a conserva e impresion cu Ministerio di Husticia ta pertenece pa herencia político na Hendrik y Rudy, ya cu nan dos a ocupe den demasiado ocasion. Y si e daño cu nan a causa no tabata duradero ta pasobra mayoria di e Hueznan no a sucumbi pa presion político o mandatonan di kende na dado momento tabata nan hefe administrativo.

E Fiscalnan activo e tempo ey tampoco a baha cabez pa nan. Ainda mi ta corda e orden por escrito di Hendrik na Fiscal Hoogland exigiendo e pa e pone e detenido Sanchez, un narcotraficante, ‘ipso facto’ den libertad! Y e guera cu a sigui entre e Ministro di Husticia di Mep y e dos Fiscalnan Hulandes, Hoogland y Wijland, tabata algo historico, ya cu el a bay para te den un caso lanta pa Fiscal Wijland contra Gobierno (lesa: Hendrik!)! Mi ta sigur cu Hendrik no ta un ‘principiante’, pero di cu el a comete erornan barbaro como Ministro di Husticia ta bon documenta! Y no ban papia mes di Rudy!

Además, ainda mi ta corda e titular grandi den un corant Hulandes cu tabata bisa cu e Ministerio di Husticia na Aruba “zucht onder corruptie”! Mi no ta kere cu ta necesario pa mi extende mi mes mas riba e topico, ni e ilustracionnan cu ta papia di erornan grave cometi pa tata y tio. Mi ta spera cu e ehemplonan aki ta suficiente pa convence e Parlamentario cu e mester ta mas prudente ora di lanza critica, y sigur mas consciente di loke ta un simple desviacion di forma versus erornan di envergadura cometi pa otro Ministronan di Husticia den e pasado reciente.

Arthur Dowers ta un plus pa cualke Gobierno y cualke pais. Su integridad ta incuestionable y su enfokenan hopi acerta. E tey pa yuda crea un clima di confianza den e sistema di husticia cu ta funciona na Aruba, y cu ta basa riba un di e mihor sistemanan na mundo, o sea esun Hulandes.Di cu e no ta funciona semper optimalmente no ta debi na e fayonan di e sistema, sino di esnan encarga cu e ehecucion di dje. Na Aruba, danki Dios, esey no ta e regla, sino e excepcion.

Ora cu bo tin un Ministro di Husticia manera Arthur Dowers bo por conta cu no ta bay tin ningun clase di manipulacion político den e departamento ultra importante ey. E ta un persona di principio cu ta atene su mes na e Leynan civil y penal di nos pais, y lo haci su best pa nan ser obedeci pa tur ciudadano por igual.

Al fin y al cabo, Husticia ta algo serio, algo fundamental pa e bon funcionamento di un democracia. Ta precisamente ora cu un Pueblo sinti cu no tin husticia, o cu e ta ser manipula politicamente, bo ta haya e revolucionnan sangriento caracteristico di e parti sur di nos continente.

No tin nada peor cu un husticia temeroso, corupto o complaciente cu politiconan. Mi ta convenci cu den e mannan di Arthur, esey no ta bay sosode na Aruba! Aki, husticia ta funciona, y e ta funciona bon, pasobra nos tin un Pueblo inteligente, consciente di su debernan mescos cu di su derechonan.

Mi ta termina uniendo mi mes na e pensamento di e filosofo Spinoza, den e sentido cu un ser humano no ta nace ciudadano, sino cu bo tin di siñe bira uno. Y nos Pueblo a siña loke ta orden for di e Hulandesnan, pa asina bira un conhunto di cudadanonan respetuoso di nan pais y nan husticia.

- Advertisement -

1 COMMENT

  1. Saludos:
    Mayoria di e intelectualnan (den nos planeta) a yega na e conclusion cu Husticia ta igualdad di Derecho [y igualdad di Debernan] dilanti e Ley. [¿?] No cumpli cu e Derechonan (y e Debernan) di e hendenan ta e ora Inhusticia.
    Cu tur respet, den e mundo aki, of den determinado pais (p.e. Hulanda of Aruba) hamas por impera e Husticia debi cu no ta existi un balans (equilibrio) entre e Derecho y e Deber.
    Nuevamente, cu tur respet, ariba su mes ta un Falacia (un mentira) y mas aun, un Utopia afirma cu e Husticia ta impera of por impera den determinado lugar. E Inhusticia ta Impera y por sigui Impera cu mayor intensidad na enter mundo si nada ta wordo haci. E Inhusticia ta un cos cu nos ta biba cu n’e den e mundo aki, den e temponan actual. No reconoce esey ta nifica cu nos ta biba den pasado.
    E Derecho di Estado y e Derecho Internacional no ta wordo reconoci como tal. A wordo kibra! Un ehemplo ta Merca: dia bieu nan a viole, nan a kibre. Mi mes tabata un victima (un par di pasa na Miami) di e “hondennan”, e analfabetonan (Homeland Security) cu ta pone bo stres bira halto.
    Un cos si nos por haci: traha hunto pa e Inhusticia su intencidad bira menos.

DUNA COMENTARIO

Please enter your comment!
Please enter your name here