Home General Un Modelo Ideal Pa Regla Permiso Di Estadia No Ta Factible

Un Modelo Ideal Pa Regla Permiso Di Estadia No Ta Factible

2
0
SHARE
- Advertisement -

Debi na cambionan den e situacion local:

mr. David Kock a splica

ORANJESTAD (AAN) — Como conclusion na e entrevista cu DIARIO a tene cu Abogado mr. David Kock tocante e ley di ingreso y egreso di stranheronan na Aruba, nos a puntre kico e ta kere por ta un modelo ideal, pa e personanan cu ta pidi permiso di estadia (sea pa trabao of debi na casamento) pasa den un proceso mas lihe, pa worde acepta of nenga, sin nodi di cana caminda pa Corte.

Esaki ta un pregunta dificil pa contesta segun Abogado mr. Kock. Esaki debi cu e situacion ta cambia.

Pa loke ta traha e mercado laboral, el a expresa cu si nos tabata hibando e conversacion aki tempo cu Aruba tabata tin un “boom” economico, cu pa casi tur trabao no tabata tin Arubiano pe, anto por a puntra pakico mester a limita trahador di afo.

“ Pero si nos wak e situacion awor, e mercado laboral ta hopi satura y hopi hende ta perdiendo trabao. Bo lo bisa, ken tin cu haya e funcion ey? Pa nos ta honesto.

Situacionnan ta cambia, mescos cu situacion na mundo ta cambia”, mr. Kock a subraya.

E a reitera cu tur hende mester compronde cu un permiso no ta un derecho cu si un hende ta bin Aruba haya su prome permiso, of e di dos, e tin cu haya te number diez, y passport Hulandes riba dje.

“ Por ta, si mi por duna un recomendacion, si ta alarga e periodo un tiki pasobra den un aña, ora bo haci tur e papeleo pa ora bo keda cla, bo tin cu cuminza cu e siguiente proceso. Podise si alarga e periodo pa un aña y mey tambe lo alivia DIMAS hopi, cu si e ta wak cu den tres aña e tin cu traha tres biaha riba e hendenan concerni. Bo ta baha e presion di trabao tambe y tur hende ta haya mas trankilidad cu si constantemente bo mester ta den e proceso di permiso di hende”, mr. Kock a comenta.

Pero di otro banda, ta bin e pregunta cu gobierno kier haci un chekeo y puntra si e tin cu bolbe extende e permiso ey, of si e situacion local a cambia.

“ Si e no a cambia anto dune e permiso, pero si a cambia gobierno mester tin e flexibilidad di bisa cu e mester proteha su mercado local” mr. David Kock a señala.

Encuanto e casamentonan entre un Arubiano cu un persona di afo, e ta mire full otro.

“ Mi ke sa cu loke DIMAS mester haci ta tin un mehor coordinacion cu Censo, cu manera cu tin un divorcio nan ta haya sa, anto yama e partner no Arubiano bise cu su permiso a caduca, pasobra el a divorcia.

“ Pa hopi aña tin e situacion di parehanan cu ta casa, pero un ta biba aki otro ta biba aya, anto nan ta keda tog cu e papel. Mi ta kere cu un mehor coordinacion y supervision di esaki, lo por yuda sigur”, mr. Kock a subraya.

Tin un caso cu a yega na conocimento di nos redaccion di un señora casa cu un Arubiano y cu su papelnan ta den DIMAS, tin cu sali di e Isla mientras cu e tin tres luna na estado.

Tambe nan a tarda pa e papelnan bin cla. Nos a puntra mr. Kock con e ta wak e situacionnan aki (cu nos redaccion tin entendi no ta prome biaha ta sosode).

E abogado a splica cu si e partner no Arubiano ta bin di un pais cu exigencia di visa pa permanece na Aruba, e persona aki ta legal solamente pa e tempo cu e visa ta vigente.

Por ta tambe, tin desconocimento di e ley. “ E hendenan mester a compronde cu prome nan tin cu regla e papelnan, y despues e casa por bin pa keda. Prome cu regla e papelnan e persona por bin pero cu visa y cu vacacion, pero e tin cu bolbe bay”, mr. Kock a señala, aunke e ta pensa si cu den casonan asina aki, e parti humano lo mester a hunga un rol pasobra berdad no ta agradable pa e pareha, cu nan tin cu separa mientras e señora ta na estado, pendiente di ki momento e papelnan bin cla.

- Advertisement -

DUNA COMENTARIO

Please enter your comment!
Please enter your name here