Home Hudicial 12 luna di cual 2 ta condicional, pa posesion di arma di...

12 luna di cual 2 ta condicional, pa posesion di arma di candela

0
0
SHARE
- Advertisement -

JudicialORANJESTAD(AAN): Diamars J.V a presenta dilanti huez, door cu el a wordo acusa di posesion di arma di candela riba 29 di November 2009. Huez a repasa process verbal di e caso den cual tin para cu riba e anochi en cuestion alrededor di 11’or di anochi patruya a wordo manda pa Señor Froggs, dilanti di cual lo a tuma lugar un tiroteo. Testigonan a bisa cu un homber bruin cu rasta largo lo a saca arma di candela y tira cune. Polsinan na dado momento a wak un rasta ta core y nan a bay riba dje. Ora nan a yega cerca el a saca e arma y benta esaki den un bari di sushi.
Den corte J.V a splica cu for di algun tempo e tin problema cu un tal E.H y ruman di E.H y e personanan aki kendenan ta conoci di ta cana cu arma di candela segun J.V, semper ta sigui busca problema cune.
El a splica cu ta pesey e ta cana cu arma.
Segun J.V, riba e anochi ey el a bay cu su pareha banda di Kildares y na dado momento E.H a bin riba dje y cuminza bringa cune.
J.V a bisa cu el a saca su arma y tira den laira pa spanta E.H y su ruman.
Na dado momento nan a purba kita e arma for di dje pero nan no a logra.
Como cu hende a yama polis, J.V a dicidi di cana bay, pero polis a logra pone man riba dje.
J.V a keda splica huez cu e no sa mas kico pa hasi, pa e problema stop.
Huez a bisa cu apesar cu J.V tin un problema cu hende, esey no ta motibo pa cana rond cu arma di candela.
El a bisa cu si tur hende cana rond cu arma di candela, Aruba ta bira un ‘Wild West’.
Fiscal a indica cu J.V a bisa cu ta for di hopi tempo e tin problema cu E.A, pero el a declara cu ta algun luna prome cu e anochi en cuestion el a cumpra e arma na San Nicolas.
Fiscal manera ta e maneho di Ministerio Publico pa posesion di arma, a exigi un castigo incondicional di 12 luna, kitando e tempo cu el a sinta caba.
Abogado Esther Schwengle a pidi huez pa tene cuenta cu e hecho cu J.V tin dos yiu menor di edad pa cria y cu e no tin carchi di castigo.
E abogado a indica cu semper J.V a traha y cu su trabao den construccion ta habri pe ainda.
Pesey e abogado a pidi huez pa duna mas tanto un castigo condicional.
Huez na final a bisa cu e kier pa un castigo keda colga riba cabez di e acusado despues cu e Sali.
Pesey huez a dune un castigo di 12 luna, di cual 2 luna ta condicional.
Esaki kitando e tempo cu el a sinta caba.

- Advertisement -

DUNA COMENTARIO

Please enter your comment!
Please enter your name here