A cuminza cu eliminacion di varios santana di auto
Autonan placha ta wordo hiba dump pa despues wordo recicla…
ORANJESTAD (AAN)- Siman pasa funcionarionan di oficina di Minister Benny Sevinger hunto cu polis di bario y City Inspector a pasa inspecciona varios santana di auto. A papia cu e doñonan di e lugarnan aki y a pidi nan permiso pa deshaci di e autonan bieu cu ademas di ta duna un mahos bista, ta un criadero di djaca, tur sorto di insecto y tambe malesa. E doñonan a duna permiso y ayeramainta tempran Minister Sevinger y funcionarionan di su despacho a bay prome na un santana di auto na Bushiri pa wak con e trabao ta bay worde haci.
A toca honor na Minister Sevinger pa duna inicio na e trabao door di primi riba un knopi pa asina placha e prome auto bieu. E autonan placha ta worde hiba dump unda nan lo keda mientrastanto te ora duna permiso na un compania cu ta bay manda e metal afo pa e worde recicla.
Tin tres compania interesa pa haya e permiso aki, pero te ainda no a tuma un decision definitivo cua compania lo bay worde encarga cu esaki. Mientrastanto e trabaonan ta sigui y ayera caba un cantidad grandi di auto bieu a worde hala di caminda.
