Absolutamente e no a manda polis pa ataca ningun hende

Publication: Wednesday, 3 March 2010. Categoria: Politica

Minister Dowers ta reacciona tocante critica:
Pero polis ta haci su trabao dentro di margen di ley!
ORANJESTAD (AAN) — DIARIO a entrevista Minister di Husticia y Enseñanza mr. Arthur Dowers, relaciona cu un critica fuerte cu a ser haci rond di su persona, debi na cierto medida cu el a stipula den e contexto di orden publico. E mandatario a splica cu como minister di husticia, e ta carga e responsabilidad politico pa e trabao cu Polis ta haci. Pero e no ta na haltura directamente di kico a sosode den e caso cu e persona ta critica, y Polis cu ta responsable di e area di Hotel, pa peticion di turistanan y managernan di Hotel, a actua contra e personanan cu lo ta bende time sharing (OPC).
El a bisa cu absolutamente no ta berdad loke e tin entendi cu a bin den media cu Minister di Husticia a manda polis pa bay ataca cierto hendenan.E dignatario a subraya cu polis ta haci su trabao segun ley, y ora cu nan ta hacie su ministerio ta analiza si loke nan ta haci ta na margen di ley y husto pa actua asina.

Minister Dowers a subraya cu e tin entendi cu pa hopi aña largo e situacion tabata cu tur hende por a haci loke ta worde comenta na e momentonan aki, y cu esey ta treciendo cierto problemanan pa personanan cu ta traha den e area di time-sharing.

E dignatario a splica cu el a conversa cu varios hende cu ta den e sector menciona y su punto di salida ta na e momentonan aki, y e lo conversa cu Comisario di Polis, pa yega na un palabracion cu tur hende y sinta na mesa pa logra un solucion.

Minister Dowers a señala cu tin diferente aspecto den e asunto aki y e hecho ta keda cu polis ta haci su trabao dentro di e margen di ley, pero mirando cu tabata tin un falta di maneho pa añanan largo, aworaki e hendenan ta sinti cu nan tin cierto derecho adkiri.

Esaki ta lamentable pasobra ora autoridadnan ta laga di haci nan trabao, ora cu nan kier bay implementa e reglanan cu tin, nan ta haya den problemanan serio. E titular di Husticia a agrega cu e no ta compronde pa ki razon e persona concerni a publica e critica, si ta cu e ta worde afecta of cu tin motibonan politico pa hacie.

Pero e ta aclarea cu si acaso e ta sugeri cu, como minister, el a manda hende specificamente pa aplica e ley of pa ataca cierto hendenan, esey absolutamente no ta berdad. El a remarca cu si ta asina cu a yega momento pa sinta cu tur esnan envolvi pa yega na palabracion con ta bay atende den futuro e asunto aki.

“ E responsabilidad y seguridad di tur hende cu ta trafica den e area ey ta di polis y ta cay bao di Minister di Husticia, pero mi no ta kere cu ta na su lugar cu esnan cu kier sugeri cu mi a haci algo deliberadamente, cu ta contra ley of contra otro reglanan di comunidad, pa perhudica nan pasobra esey no ta e caso”!