Home General Alto Comisario Peter de Witte cla pa bandona Aruba y sigui traha...

Alto Comisario Peter de Witte cla pa bandona Aruba y sigui traha na St Maarten

3
0
SHARE
- Advertisement -

comisariodewiteMinister di husticia di Antiyas ta confirma Peter de Witte como mihor candidato…
Mr drs Arthur Dowers tabata sa di e deliberacion andando…
ORANJESTAD(AAN): Peter de Witte a solicita pa e puesto di Alto Comisario na St. Maarten y Gobierno Antiyano a acepta su solicitud y lo dune e puesto tambe. Aunke cu ainda Peter de Witte mes lo mester confirma cu e lo tuma e paso di bandona Aruba pa sigui cu su carera policial na St. Maarten. Ta for di algun luna pasa caba e proceso a cuminsa pa recluta un Alto Comisario nobo pa e isla di St. Maarten. Esaki ta masha necesario despues cu e isla a pasa door di algun caso serio di corupcion policial pa cual algun funcionario halto di e cuerpo, entre otro su Alto Comisario a worde persigui penalmente.

 Entre e grupo di 5 persona cu a solicita pa e puesto ta figura tambe Peter de Witte di Aruba. El a pasa algun test y segun informacion ricibi su test a sali esun mihor. Den e grupo aki tin tambe e actual Alto Comisario Interino, Sr. Panneflek.

Awe Conseho di ministronan di Antiyas a ricibi e proposicion oficial den cual e comision ta propone pa nombra Peter de Witte mes como Alto Comisario di e isla di St. Maarten. Mester bisa cu Minister di Husticia di Antiyas Magali Jacoba a confirma esaki na nos y a anuncia cu awe e mes lo yama e Alto Comisario di Aruba pa anuncia e noticia na dje, esta cu su solicitud a keda acepta! Aki na Aruba, Alto Comisario Peter de Witte a drenta servicio y a tuma timon over di nos Cuerpo di Polis na November 2006.

Esaki tempo cu Alto Comisario Ronny Bernadina a anuncia su retiro den forma inespera y den cual el a bisa cu e no por sigui dirigi e cuerpo mas y a pasa e timon na un otro persona. E tempo ey te hasta el a conseha gobierno pa busca un hulandes pa haci esaki. Peter de Witte a firma un contract di trabao di tres aña cu Gobierno cu a caduca na December 2009.

Tabata aña di eleccion pues no a tende nada mas di renobacion di contract y como tal e contract a sigui core normal. E relacion di e alto comisario cu e gobierno anterior por tabata pinta bon di pafor pero di paden durante algun incidente por a scucha expresion habri di ex prome minister cu atakenan directo den direccion di e alto comisario.

E pregunta cardinal ta kico lo sosode awor den Cuerpo di Polis mes y ken lo sigui maneha Cuerpo Policial. Tin opcionnan na cantidad, manera ta trece ex-Alto Comisario Ronny Bernadina back, of acerca ex-Comisario Gerold Dompig pa bin yuda e cuerpo. Gobierno por pensa den atrae un Hulandes pa bin sigui na cabes di nos Cuerpo di Polis. Esaki for di fuentenan den cuerpo policial ta kere cu e idea di busca un otro hulandes no ta corecto.

Tambe Gobierno tin e opcion pa check kico tin den cas mes, manera ta nombra un di e dos comisarionan, esta Truddy Hassell of Dolfi Richardson como Alto Comisario. Ainda por evalua pa bay den e hobennan den puesto ehecutivo den e cuerpo manera ta Robert Candelaria of Vanessa Kock.

Di otro banda Peter de Witte mes a bisa di a keda asombra cu e noticia aki pasobra e mes no sa di nada. Berdad el a confirma di a worde acerca y di a bay di acuerdo pa solicita pa e puesto na St. Maarten pero no a tende nunca mas cu si el a keda accepta of no. Tambe el a reitera cu ainda e mes tin cu tuma un decision final cu si e kier tuma e puesto aki of no.

Tin un chens tambe cu Aruba por ofrece un contract mas of hasta un mihor oferta pa e dicidi cu si e ta keda of no. Kizas den e proceso ey Gobierno di Aruba lo mester bay awor, esta pa evalua criminalidad y maneho di Polis na Aruba na November 2006 y check awor na Maart 2010 pa mira cu si criminalidad a baha, si pueblo ta mas contento cu e servicio cu Cuerpo Policial ta brindando y si e Polisnan mes ta satisfecho cu e forma con nan hefe maximo ta guiando e cuerpo.

Contesta riba e tres preguntanan aki lo port a cardinal pa Conseho di ministronan dicidi cu si kier sigui cu Peter de Witte mes na cabes di nos Cuerpo di Polis of si ta pensa cu awor ta momento pa sanger nobo core den e benanan di e defensornan di ley.

- Advertisement -

DUNA COMENTARIO

Please enter your comment!
Please enter your name here