Diario Online

Aruba Airlines su prome avion a yega Aruba ayeratardi for di Chicago

Publication: Thursday, 4 March 2010. Categoria: General

Lo haci charter cu un Piper Chieftain PA31-350
ORANJESTAD (AAN): Pa hopi tempo caba hende tabata puntra nan mes kico ta Aruba Airlines of ken ta Aruba Airlines. Finalmente e compania aki ta asina leu cu e por cuminsa revela su mes na e comunidad Arubano. Ayera tabata un dia grandi pa Aruba Airlines, ya cu a celebra yegada di nan prome avion. Aruba Airlines ta un compania local cu ta den pleno preparacion pa termina e proceso, pa logra nan Airline Operator Certificate(AOC).

Cu yegada di e avion di Aruba Airlines, un Piper Chieftain PA31-350 cu capacidad di 7 pasahero y matricula N9975W, e compania ta duna inicio na un etapa nobo den e proceso pa cuminsa cu nan operacion mas pronto cu ta posibel.

E yegada di e avion di Aruba Airlines ta pa sigui cu e proceso, pa logra obtene mas pronto cu ta posibel nan Airline Operator Certificate(AOC), Parti di e proceso pa haya e AOC ta cu Aruba Airlines, mester percura pa haci cierto vuelonan di prueba cu lo keda ehecuta dentro di poco, pa asina hunto cu Departamento di Aviacion civil, demostra cu Aruba Airlines por cumpli cu loke tin skirbi den e manualnan.

Na mes momento Aruba Airline ta terminando cu tur e entrenamento di e pilotonan. Na haltura di e proceso di entrenamento aki, ta necesario pa e avion ta na Aruba, pa por continua cu e seccionnan di ehercicio, pa Aruba Airlines sigui cumpli cu tur regla y rekisito di Departamento di Aviacion Civil ta exigi di un compania cu ta desea di ehecuta vuelonan charter y regular.

Aruba Airlines naturalmente tin un obhetivo. E obhetivo principal di e compania aki ta pa den futuro yega mucho mas leu cu solamente buelo charter pa Punto Fijo y Antiyas Hulandes. Aruba Airlines tin deseo pa mas rapido posibel, amplia su destinacion na mundo.

Prome mester cuminsa chikito pa despues desaroya e compania den un aspecto mas grandi. Ora cu tur cos ta na luga y e compania ta oficialmente den operacion, e ora ey ta implementa e siguiente pasonan pa amplia e compania.

“Awor cu e avion ta na Aruba, oficialmente por cuminsa planea riba e fecha di vuelo inaugural di Aruba Airlines”, asina sr. Onno de Swart, CEO di Aruba Airlines a indica.

Pa ehecuta e vuelo inaugural, Aruba Airlines mester ricibi e AOC, cu lo keda entrega despues cu Aruba Airlines cumpli cu e rekisitonan di Departamento di Aviacion civil. Sr de Swart ta kere cu nan por logra esaki den un tempo record.

Aruba Airlines ta un compania netamente priva, cu inversionistanan local y cu ta trahando pa asina mas pronto cu ta posibel cuminsa brinda su servicionan na e comunidad Arubano, Antiyano y Venezolano.