Diario Online

Aruba tin mucho obstaculo innecesario cu ta stroba hende humilde yega na nan propio negoshi

Publication: Diahuebs, 11 Maart 2010. Categoria: General

Segun Andin Bikker,
ORANJESTAD (AAN): Durante conferencia di prensa di PDR recientemente, lider di e partido Andin Bikker a trece dilanti cu na otro paisnan den Caribe cu ta competi cu nos nan tin diferente tipo di proyecto caminda cu nan a bay analisa kico ta e obstaculonan administrativo innecesario cu ta stroba hende por ehempel di yega na nan propio negoshi. Segun Bikker, esaki ta di aplaudi pasobra na final di dia negoshinan nobo ta crea cuponan di trabao, personanan ta paga belasting etc.
Na Aruba tin varios miles di hende sin trabao y pesey Aruba tambe tin cu pensa den e direccion ey. Aruba mester stimula pa negoshinan nobo worde estableci na e manera mas practico y facil posibel.

E parlamentario a bisa cu el a haci un analisis di e obstaculonan innecesario cu tin.
Entre otro el a ripara por ehempel cu na Curaçao den un atardi bo ta haya un ‘vestigingsvergunning’ pa 5 Florin, mientras cu na Aruba bo tin cu paga 2000 Florin y e ta dura lunanan pa bo haya esaki.

Na Aruba ta asina tambe cu a bira un practica cu nan ta puntrabo pa bo bay busca un declaracion cu abo como persona no debe ningun belasting, sino bo no ta haya bo vestigingsvergunning.
Segun Bikker esaki no ta corecto, pasobra ta e ‘N.V’ tin cu haya e vestigingsvergunning y e ley di vestigingsvergunning no tin nada di haber cu pago di belasting of no.

Tin rekisitonan pues cu ta worde pidi cu no ta para den ley di ordenanza pa vestigingsvergunning.
Eseynan pues ta obstaculonan innecesario cu ta stroba un persona humilde di yega na su propio negoshi, door di bin pues cu hopi exigencia cu no ta para den ley.

Pesey Bikker a manda un di tres carta pa Minister di Economia caminda cu Bikker ta puntra si e Minister no ta haya cu a bira tempo pa kita e exigencianan aki cu no tin base legal.
E carta ta pidi e Minister tambe si e no por baha e prijs di 2000 Florin cu bo tin cu paga pa un prijs mas aceptable.

No por ta asina cu na Curaçao ta 5 Florin y na Aruba ta 2000 bo tin cu paga pa mescos.
Mester purba moderniza tambe e ley di ordenanza, pasobra e ultimo cambio den e ordenanza aki ta data di 1948.