ORANJESTAD (AAN): Den asuntonan di profesion, banconan no ta entre esnan cu nos lo asocia facilmente cu liderato femenino. Mas bien ta e caballero den bachi skur ta determina e imagen cu mayoria di nos tin di e bankero.
Pero un banco local ta cambiando e imagen aki completamente.
Mientras mundo ta conmemora ‘Dia Internacional di Hende Muher’, celebrando e logronan di hende muher rond mundo, RBTT Financial Group ta duna un ehempel akinan mes cu henter mundo por sigui.
E grupo di RBTT tin un tradicion fuerte di liderazgo femenino, cuminsando na aña 1998 ora e prome hende muher – Monica Achan – a worde apunta como ‘Country Manager’ pa maneha RBTT Bank St Kitts/Nevis.
Na cierto momento, nuebe di e diestres ‘Country Managers’ di banco tabata hende muher. Awe, tin shete hende muher entre e ‘Presidents and Country Heads’, manehando e banconan di RBTT Bank den e siguiente teritorionan:
Edna Farro – President & Country Head, Aruba. Harriet Thornhill – President, Eastern Caribbean. Champa Rampersad-Barnes – Country Head, Grenada.
Tambe tin Minna Israel – President & Country Head, Jamaica. Corliss Sutton-Charles – Country Head, St. Kitts.
Tambe tin Mary Popo – Country Head, St. Lucia. Finalmente Arvinder Bharath – President & Country Head, Trinidad & Tobago.
Nan nombramento ta refleha e tendencia den e grupo di RBTT den transcurso di añanan. Hende muher ta forma 70% di e personal di RBTT Financial Group, y nan representacion na nivelnan profesional, di liderato y ehecutivo ta creciendo.
“Esaki ta un refleho cu mas hende muher ta hayando oportunidad pa crece y desaroya nan mes profesionalmente pa asina yega na careranan exitoso,” Amos Herai, ‘Head of Human Resources’ a bisa.
E tendencia aki kisas ta mas visibel na RBTT, pero seguramente e no ta algo unico.
“Awendia nos ta observando mas hende muher den negoshinan: no solamente nan ta capaz pa tuma over e negoshinan di famia, pero tambe otro posicionnan ehecutivo compara cu 10-15 aña pasa,” Edna Farro, ‘President & Country Head” di RBTT Bank Aruba ta observa.
Riba e pregunta si ainda e ‘glass ceiling’ ta exisiti, e ta bisa cu e posibilidadnan pa crece den un carera ta real, aunke un hende muher no semper ta e prome escohencia. el a añadi cu hende muher mester haci uzo maximo di e oportunidadnan cu ta presenta na comienso di nan carera.
“Hende muher por pasa door di e ‘glass ceiling’ door di ta persistente y tuma mando di nan carera y door di expresa nan compromiso y ambicion pa llega na posicionnan ehecutivo. Naturalmente e ta un yudansa ora empresanan ta crea un ambiente cu ta encurasha diversidad.”
Comentando riba e aumento di hende muher den e posicionnan di mas halto den diferente ramo, el a bisa: “Nos tin suerte cu nos tin hopi hende muher den posicionnan prominente den politica, husticia, comercio, ramo medico, arte y den otro areanan. Esaki ta manda un mensahe positivo pa e comunidad cu nan yiu muhernan por logra nan potencial den cualkier area. E comunidad a apoyami y aceptami, y a demostra nan orguyo di tin no solamente un Arubiano, pero ademas un hende muher den un posicion di lider den e sector bancario.”
Si no tabata pa e hecho cu RBTT tin un tradicion di liderazgo femenino hopi tempo prome cu e Royal Bank of Canada (RBC) a tuma nan over, hende lo por a pensa cu tabata simplemente un replica di e compañia madre, cu a apunta hende muher den un tercer parti di tur e posicionnan ehecutivo y di ‘senior manager’. Diversidad ta un valor comun di RBC y RBTT y ta un di e tanto areanan unda tin un fit natural entre e compañia madre y e subsidiario.
RBC CEO, Gord Nixon, a bisa: “Mientras nos ta traha pa crea balansa entre e puntonan fuerte, talentonan y diferencianan di nos forsa laboral door di elimina bareranan y door di desaroya nos hendenan pa alcansa nan potencial, nos ta fiha hopi riba laga mas hende muher avansa den posicionnan mas halto. Esaki no ta solamente lo corecto pa haci, pero e ta bon pa e negoshi tambe. Hende muher ta forma mas cu mita di e poblacion mundial y nos liderazgo mester ta un refleho di e comunidadnan unda nos ta opera.”
Dunando oportunidadnan na miembronan diverso di e forsa laboral ta un cos; e boluntad y abilidad pa haci uzo di e oportunidadnan aki ta algo otro Un cantidad significante di hende muher ta laga otro consideracionnan prevalese riba e progreso den nan carera, sin realisa cu un balansa saludabel ta posibel entre e diferente responsabilidadnan cu nan ta carga. Hecho ta, cu hende muher tin abilidadnan unico pa logra como lider, segun Arvinder Bharath, ‘President & Country Head’, RBTT Bank.
Banda di e hecho cu hende muher tin integridad, corahe, perseverancia, conocemento y un actitud positivo – ingredientenan crucial pa liderazgo excepcional – el a bisa cu hende muher ta uza tambe nan pasion, humor, sensibilidad, sentido comun, confiabilidad y tenacidad.
“E abilidad pa maniobra entre diferente cosnan pareu y pa pensa practico den situacionnan compleho ta abilidadnan cu hende muher ta nace cu nan. Ademas, hende muher tin tendencia di tin mas respet pa nan coleganan, cual ta conduci na un ambiente mas colaborativo y di mas satisfaccion”, el a bisa.
E estilo di liderazgo di un hende muher tin e tendencia di ta mas colaborativo cu di hende homber y esaki sigur ta refleha den Bharath su maneho. Den temponan di incertidumbre e ta enfoca riba un analisis critico di e situacion y riba un dialogo habri.
“Mi ta tuma tempo pa compronde mi opcionnan y nan consecuencianan. Den mayoria di caso, esaki ta haci e decisionnan mas cientifico y consecuentemente mas facil pa comunica,” el a bisa.
Hende muher ta keda e cuidador principal den nos sociedadnan, loke ta pone un peso adicional di responsabilidad riba cada hende muher cu ta traha. Hopi biaha nan exito ta rekeri strategianan desaroya cuidadosamanete pa mantene un balansa entre nan trabao y bida priva.
Pa Bharath, e paso principal ta pa tuma e decision pa realisa un balansa entre trabao y bida priva y compromete na esaki.
“E no ta un evento, mas bien un biahe cu ta rekeri un compromiso continuo. Den transcurso di tempo e ta bira algo natural, pero si bo stop cu e rutina, costumbernan bieu ta bolbe back – particularmente den posicionnan di liderazgo mas halto, caminda actividadnan diario por exigi tur cos di bo. Aunke mi no ta logra semper, mi ta keda purba na un manera disciplina,” el a bisa.
Citando dato Europeo, unda ta sugeri cu hende muher ta abstene di aplica pa trabaonan cu nan no ta equipa 100% pa nan, mientras hende homber ta comfortable si nan ta fit pa 60%, el a duna e siguiente conseho na lidernan jong femenino cu aspiracion:
”Tene curashi, haci uzo di bo puntonan fuerte y laga espacio pa bo por sigui crece.”
El a conseha tambe pa mantene un “espirito constructivo di descontento” cu inevitablemente lo conduci na hisa e bara pa bo mes y tambe pa esnan rond di bo. Finalmente, el a enfatisa na lidernan cu aspiracion pa “tuma responsabilidad pa bo actonan y desaroya un set di valornan y creencianan y refleha frecuentemente riba esakinan”
Bharath y su coleganan femenino na RBTT a adkiri nan posicion entre e bankeronan mas importante di e region y nan ta construyendo un caminda di exito pa hende muhernan di tur profesion sigui.
