Cambio di fecha pa e competencia di Arte di Palabra 2010 y e Competencia di haiku na Papiamento
ORANJESTAD (AAN): Mescos cu 2009, Grupo Corector di Papiamento y Comision Arte di Palabra Aruba, cu sostén di Departamento di Cultura Aruba, Departamento di Enseñansa y e aña aki cu colaboracion di UNOCA tambe, ta organiza e competencia exitoso, Arte di Palabra.
Arte di Palabra ta un competencia di cuenta cortico y poesia pa hoben entre 13 y 17 aña. Tambe e ta encera un competencia di haiku pa grandi y chikito. Di e forma aki ta sigui aporta na stimula y promove arte literario den nos comunidad.
Pa duna mas tempo na esnan interesa a hala e fecha di entrega di obra y formulario di inscripcion te dia 10 di maart 2010. Por entrega esaki na Departamento di Cultura Aruba (banda di Misa San Francisco) cerca Glenda Reiziger of via e-mail glendareiziger@hotmail.com
E fecha di e competencia mes lo ta dia 16 di maart 2010 y lo anuncia e lugar despues.
Mescos cu aña pasa e ganadornan di e competencia lo ta e representantenan di Aruba y lo participa contra e ganadornan di Curaçao y Boneiro dia 27 di maart proximo na Curaçao. Ademas cada participante di Arte di Palabra 2010 lo haya un certificado di participacion.
Hoben demostra bo creativividad y bo talento pa skirbi. Libremente acerca bo docente di Papiamento na school pa duna bo sosten den esaki. Mayor si bo yiu tin talento pa skirbi apoy’e y motiv’e pa inscribi.
