Diario Online

Cambio importante riba cruzada di ex House of Cheng ta na caminda

Publication: Wednesday, 10 March 2010. Categoria: General

ORANJESTAD(AAN): Den entrevista cu minister di husticia Arthur Dowers a puntre riba e cambio cu e kier trece riba Sasaki Weg, posiblemente cerando e cruzada di ex House of Cheng.
Segun e Minister, en cruzada peligroso ta bao di evaluacion, for di momento cu Ministerio di Husticia a instala e comision cu ta encarga cu trafico y tin un recomendacion tambe pa cera un parti di e caminda, pasobra e forma cu e caminda aki ta traha, toch ta mustra cu e ta crea un situacion caminda cu hendenan no por reacciona lihe ora nan subi e caminda, pasobra e autonan cu ta bin for di direccion di Malmok, bo no ta wak nan di hopi leu.
E Minister a bisa cu e hecho cu e personanan cu ta bin fir di direccion di Malmok ta core auto demasiado duro, ta loke ta crea problema.

E problema aki por worde temporalmente y parcialmente soluciona, door di kita e posibilidad pa hende cruza bay na man robez.

Esey ta e recomendacion cu tin y dentro di algun dia lo por yega na haci e cambionan pa cu e cruzada aki.

“Nos mester realiza si cu tin accidentenan cu a pasa na e cruzada aki pa motibo cu hendenan a uza e cruzada aki sin paga tino, pero den tur e accidentenan unda cu hende a perde nan bida, tabata tin coremento di auto mucho duro”.

Esaki segun Dowers kende a bisa cu e cruzada aki en combinacion cu coremento di auto mucho duro, tin consecuencianan devastador.

E mandatario a bisa tambe cu su ministerio ta tumando e pasonan pa yega na hopi mas presencia di polis riba e caminda aki.

Na dado momento lo yega na un control permanente riba esnan cu ta core mucho duro.
E Minister a bisa cu ora cu el a sali cu polisnan pa tira un bista riba e situacion riba e caretera aki, el a ripara cu apesar cu e luz di polis tabata hopi visible, el a constata varios hende ta sigui core duro.