Campeonato Fedeveta 50 plus ta cuminsa awetardi veld di Estrella y Nacional
ORANJESTAD (AAN)— Diario Deportivo tabata presente den e conferencia di prensa cu a wordo yama pa FEDEVETA, cu motibo di e apertura di e campeonato di liganan 50 y 40 plus, e conferencia aki a tuma lugar na Sha Sha Restaurant. Sr. Joy Fingal, presidente di Fedeveta, a splica na esnan presente cu Diasabra awor, 6 di maart, Fedeveta su futbol di veterano di 50+ lo inicia riba tereno di Estrella cu 3 wega y tambe na Nacional lo bai tin 2 wega. E siman siguiente e campeonato di 40+ lo inicia riba tereno di Sport boys, Nacional y riba tereno di RCA.
E aña aki den e categoria di 50+, tin 11 team participando mientras cu den categoria di 40+ nos ta haya 17 team.
E campeonato di 50 y 40+ ta wordo hunga un tras di otro pues cada salta un siman. Segun schedule e campeonato di 50+ lo termina dia 28 di Augustus y esun di 40+ dia 4 di September y despues pa 11 di September e campeonato di 35 plus lo start sali y lo bai te fin di November.
Un biaha mas e team di referee cu lo bai dirigi e campeonato ta bao di cargo di sr. David Cruz. Personanan cu ta desea pa fluit weganan di Fedeveta por tuma contacto cu David Cruz Tradicionalmente e campeonatonan ta wordo dedica na un futbolista cu ta participando ainda den un di e liganan. Pa e campeonato di 50+ e aña aki a toca turno na e siguiente personanan:
Nol Hernandis di Caravel, Rudy Loopstok di Barcelona y Chito Tromp di Rooi Afo.
Pa e campeonato di 40+ tambe tin 3 hungador nomina esta Raymond (Moontjie) Escalona (Roma), Martinus Dirksz (Sport Boys) y Giovanny Tromp (Jong Brazil).
