Diario Online

Cruzada peligroso riba Sasakiweg ta wordo cera parcialmente

Publication: Diaranson, 10 Maart 2010. Categoria: General

Parlamentario Paul Croes:
For di parlamento a haci un esfuerzo pa contribui pa cu un seguridad den trafico!ORANJESTAD (AAN): Partido AVP a tene su conferencia semanal. Drs Paul Croes a hiba palabra caminda el a cuminsa na manda palabranan di forza na e famia di esnan cu a fayece durante fin di siman durante un accidente tragico. A manifesta cu bin tuma nota durante e ultimo lunanan di un tendencia negativo riba e trafico akinan na Aruba. A agrega cu diferente accidente a tuma lugar, famia a keda den dolor.

Segun Paul Croes, e politiconan tin diferente rol den comunidad y un di e rolnan naturalmente ta pa usa e microfononan cu nan tin na nan disposicion pa concientiza comunidad riba e gravedad di e situacion.

Gobierno naturalmente tin su rol cual ta crea un infrastructura corecto y pone e reglanan den nan lugar. “Pero Gobierno no ta stuur bo auto pa bo. Gobierno no ta sinta tras di stuur, bisto bo seat belt cu tur eseynan”, a manifesta.

Ademas di e dolor cu e perdida di un ser keri ta nifica of cu un persona cu ta keda handicap, a bisa, e ta costa nos pais, cuerpo policial, AZV, e famia mes hopi placa, cual ta aspectonan cu mester tuma no ta di dje.

Relaciona cu e problema di trafico e fraccion di AVP a trece mas cu un mocion cu diferente aspecto cu ta importante pa tene cuenta cune. Nan a haci pregunta den diferente reunion por ehemplo un reunion publico dia 15 di Januari 2010 caminda nan a haci pregunta y nan a entrega dos mocion na Parlamento, a bisa.

Paul Croes a repasa un rato e mocion caminda nan a pidi gobierno atencion pa cu e situacion.
Den e dictum nan a menciona y a considera diferente accidente cu tabata tin na Aruba y otro aspecto manera falta di iluminacion banda di caminda.

A urgi gobierno pa lo siguiente:
* pa haci cambionan necesario na iluminacion na camindanan principal
* pa cuminza cu un campaña agresivo di concientizacion caminda e enfoke mester ta riba reglanan principal di trafico
* pa haci evaluacion di e landsverordening, wegverker y su decretonan pa wak unda por trece cambionan cu normanan internacional
* pa sinta cu colega di infrastructura pa evalua situacionnan manera cera camindanan peligroso, pone rotonde, luznan oranje na cruzadanan y camindanan peligroso, borchinan riba caminda, etc
* pa bin cu un solucion structural pa elimina scarcedad di personal di polis poniendo mas cu un klas anualmente y pa haci un evaluacion di e software Act Pol y si ta necesario bay back na Ex Pol y upgrade esaki

A agrega cu tambe AVP como fraccion a haci bishita cerca cuerpo policial caminda nan a haya sa internamente kico ta sosodiendo pa wak di por yega na alivia esnan cu ta responsable pa nos seguridad riba caminda.

Banda di esaki a bisa cu diferente di e puntonan aki a worde treci dilanti caminda tin descontento den e personal a base di bevordering, scarcedad di personal pero tambe e software aki a worde menciona hopi durante e reunion.

Den otro mocion segun drs Paul Croes a pone tambe pa urgi gobierno haci estudionan tecnico y financiero pa introduci ekiponan pa detecta y saca potret di vehiculonan cu ta core duro dimas.
A base di e estudio ta pidi pa invita companianan priva cu tin experiencia riba implementacion y maneho di e ekiponan aki pa un destaho publico.

Pa bin na un acuerdo cu companianan cu ta participa den un destaho publico cu por lo menos 90 porciento di e trahadornan mester ta local.

Tambe ta urgi gobierno pa cambia e landsverordening wegverker AB 1997 number 18 pa legaliza e uso di e ekiponan menciona pa detecta y demostra cu un vehiculo di motor ta core riba un velocidad mas halto cu ta permiti, a indica.

Tambe e cambio di e landsverordening aki pa permiti dunamento di boet a base di informacion ricibi for di e ekiponan aki na e doño di e vehiculo concerni segun datonan di registracion y pa den un comision instala pa minister revisa e sancionnan aplicable actualmente y pa e comision aki introduci e posibilidadnan pa strafnan minimo, a manifesta.

For di parlamento a haci un esfuerzo tambe pa contribui pa un seguridad den trafico. A agrega cu nan a haya e grato noticia for di minister ayera cu conhuntamente cu conseho di Cuerpo Policial lo a yega na un decision pa cera e parti mey mey di e cruzada conoci como di House of Cheng, poniendo mas control riba e caminda ya cu esaki lo por crea un situacion cu autonan ta bay core mas duro.

Pero teniendo mas control banda di caminda y cu e ciere di esaki lo por alivia e situacion cu autonan no ta cruza subi e caminda, a bisa. A sigui bisa cu e caminda pa The Mill ta keda habri pero solamente e parti mey mey ta keda cera.