Cruzeiro a bira campeon di Volleyball Hubenil Damas
ORANJESTAD (AAN)— Hubenil tabata tin e wega cruzial entre Cruzeiro y Gazelles. E muchanan di Gazelles a comete e error di yega bastante laat, pa e motibo ey nan no por a warm up hunto, ni warm up na net, nan mester a cuminsa wega mesora. E wega tabata programa pa cuminsa 6:00 p.m y a warda te 6:21 p.m pa por a cuminsa, esaki tabata tin su refleho mesora riba e wega. Cruzeiro cu a haya tur tempo pa warm up, a cuminsa fuerte y sigur di su mes. Den un rato e prome set tabata 12-3, despues 19-4 y a termina na 25-6.
Den di dos set Gazelles a purba empata e wega pero Cruzeiro a domina bastante pa trek e set ey tambe pa nan: 25-18 y asina Cruzeiro a titula Campeon den dos wega di final.
Strea di e anochi a keda Kathlyn Baarh, di 14 aña. E tin bon haltura y por smash, serve duro y block sin problema.
Ta un lastima pa Gazelles cu sigur por a duna mihor bataya, si e muchanan tabata sa di yega na tempo pa prepara pa un wega tanto decisivo asina.
Gazelles a gana den semifinal for di Cruzeiro y for di La Fama, den final tur dos biaha e muchanan ta yega laat y no por prepara bon pa e wega. Ta keda un lastima grandi pa falta di disciplina.
Despues tabata otro wega yen di tension di La Fama y Gazelles den U-21. U-21 ta e damitanan cu no tin 21 aña ainda, pues no por hunga den Hubenil, pero cu no ta cla ainda pa A-klas.
Tabata un wega no apto pa esnan cu ta sufri di curason, e wega a dura te na final cu dos team cu no ta duna ningun punto regala na otro.
Pauline Arends a purba cu smashnan sigur, di domina Gazelles, pero Aljenshka tabata tey pa saca nan y trece e bala bek pa dilanti. E publico tabata bira loco pa cada punto cu cai. E wega a termina cu 3-2 na fabor di La Fama, pero Gazelles a priminti cu diaranson dia 3 di maart ta otro gai ta canta.
Por ultimo tabatin e dos wega di semi-final entre YMCA y La Fama. La Fama a perde e prome wega contra Gazelles (3-1) y awor contra YMCA tampoco e no por a haci mucho cos. Tabata parce mas bien cu YMCA tabata tin un training outdoors.
Coach Phelipa tabata purba opstelling, otro setter, otro hugada, e no tabata pidi time-out pa su muchanan siña bataya ora score ta bira preta. E ta preparando pa final? En todo caso YMCA a pasa cu
3-0 riba La Fama. Den e delaster set, energia a caba den La Fama y e score a bira 25-9.
Asina nos ta mira cu den Damas A-klas ta e mesun escena ta ripiti pa final: YMCA cu Gazelles, final ta cuminsa dia 3 di maart.
Diadomingo weganan ta cuminsa 7:00 p.m en punto. No tin wega di hubenil prome.
Prome wega ta entre Tanki Leendert y YMCA. Tanki Leendert mester gana pa keda cu opcion riba e titulo maximo: CAMPEON. Si YMCA gana, e serie ta caba y YMCA ta Campeon.
Despues prome tabla lo bula den Caballeros “A” Klas: La Fama vs Centro di Bario Noord. Otro wega pa tene curason y hala roseanan grandi, si bo ta fanatico di un team, bin pa bo apoya, bin anima bo team. Volleyball ta Hot, hot na e momentonan aki.
