Home General Diadomingo scur den trafico pa Aruba

Diadomingo scur den trafico pa Aruba

164
7
SHARE
- Advertisement -

ax_fatal_100TRES CIUDADANO MORTO DEN ACCIDENTE
ORANJESTAD (AAN): Polisnan a tuma un rol proactivo den fin di siman, pa asina yuda den e concientizacion pa chofernan di Aruba core mas responsable riba caminda. DIARIO mes a mira nan ta haciendo uso di un sistema nobo di luz (poni abao riba asfalt), pa controla trafico riba e.o. Sasakiweg, den area di Palm Beach, y tambe riba Highway principal di San Nicolas pa Oranjestad.
Sinembargo nada di esaki a yuda, ora cu pa 1:55 a.m., un accidente di magnitud terible a keda registra na Rooi Barcadera, ora cu chofer di un Toyota Starlet color blanco cu number A-35864 bayendo pabao, a hala na su man robez y a bay pega di banda cu un Kia Opirus color preto cu number A-10109. Probablemente un tire di e Toyota a rementa, y e chofer a perde control riba su stuur, bay den un scual, y a dal loke expertonan ta yama “T-bone” den otro auto.
IMPACTO HOROROSO

E impacto tabata horoso! Varios pieza di auto a worde haya varios meter leu benta. Den e auto compacto di Toyota, tres alma cu no a ni haya chens di keda na tino, y a fayece al instante.
Ora cu e prome unidadnan di Polis tabata yegando, ya caba mas yamada tabata drenta na tanto Central di Polis como tambe Centro di Alarma, splicando di e embergadura di e accidente. Hendenan cu a yega cerca, a tapa nan wowo pa loke nan a mira.
Polis mesora a pidi pa mas asistencia policial yega. Ambulans como tambe Vehiculo di Rescate a yega inmediatamente. Mirando cu e tres personanan no tabata duna señal di bida, a enfoca riba e chofer di e Kia Opirus, y su ocupante kende tabata gravemente herida. E sistema di airbag di su vehiculo a yuda bastante.
Mientras cu mas hende tabata yega cerca, y ta mira kende ta envolvi, e shock a cuminza pasa door y worde retransmiti pa demas famia. Polis a dicidi e ora ey na haci algo, cu poco biaha nan a yega di haci, esta di cordona full e area, cu un diametro di decenas di meter. Esaki pa laga mirones, como tambe fotografonan di prensa mas leu posible.
Ora di tira bista den e Toyota Starlet machica, Polis a cuminza pensa cu kizas tin un Persona #4 eyden tambe, pero nan no por mire.
Docter T. Lin mientras tanto a yega na e lugar, y a constata morto di e tres personanan visible. E Docter no a bay leu, pasobra despues cu Bomberonan a corta e vehiculo di otro, a keda di check si tin un hende mas.

VICTIMANAN IDENTIFICA
——E chofer di e Toyota Starlet a worde identifica como Walter Rudolf Franken, naci dia 12 di December 1962 y biba na Pavia Park 167., conocido chofer di Dragracing na Aruba. E ta un experto den e categoria di Pro Bike, y nan a atende e evento di “Faya Bo Haya” un rato prome na Palo Marga. Ainda e sticker tabata poni riba e Toyota Starlet.
——Otro victima ta su yiu homber Randolph Jose Franken, conoci como Randy. E ta naci dia 2 Augustus 1990 (19 aña) tambe a fayece. E ta atendiendo EPI Sector Horeca, y ta gusta e.o. compone y aregla musica, toca den Gaita, prepara cuminda delicioso, y tambe deporte di motor. E ta keda conoci como un bon chef den cushina pa su amigonan.
——Finalmente tin Lorraine Cleonice Franken naci dia 1 di Augustus 1997 (12 aña). Mucho detaye, prensa no a ricibi di e mucha muher aki kende ta un menor di edad y ainda bishitando school basico.
Walter tabata bahando di Palo Margo e momento ey. Su ruman homber tabata coriendo su tras, y na cruzada di Drive In, nan a “split”. E ruman a bay direccion Santa Cruz, y Walter a sigui bin pabao… pa asina tuma otro caminda pa yega na su cas na Pavia Park… pero e tabata un otro rumbo pa su destino.
Un persona cu a yega eynan, a confirma na autoridad kende esnan den e vehiculo ta. Mirando cu na Pavia Park tin un señora cu a caba di perde su casa, y su dos yiunan, autoridad a manda Polis y un Trahador Social pa eynan, pa notifike kico a caba di pasa.
Famianan a keda devasta pa e noticia, y varios di nan a bira malo y a bay Hospital pa trato medico.

DOS HENDE HERIDA DEN OPIRUS
Mientras tanto, no obstante cu e cabina di e Kia Opirus a keda basta intacto, y cu tur dos Airbag a sali, tog e personanan den e vehiculo a ricibi basta sla na curpa. Esaki lo por ta indicacion cu nan no tabatin seatbelt bisti.
E chofer ta un persona di apariencia Asiatico, mientras cu e pasahero ta e conocido DJ J-Rick di Megateca Genie, kende na final di aña pasa a bira “DJ di Aña”. Den estado grave el a worde transporta cu urgencia pa Hospital, unda debi na e golpinan, el a haya medicamento fuerte, cu ta lage drumi por lo pronto pa asina e por sostene e dolornan aki. Ya caba e ta den Medium-Care y ta recuperando.
Na e lugar di accidente, por a mira presencia di Fiscal, como tambe Halto Comisario Peter de Witte. Cada rastro den asfalt a worde cuidadosamente preserva, y documenta door di Departamento di Trafico hunto cu Departamento Tecnico di Polis.
Funeraria Mementomori, y Funeraria del Pueblo a transporta e restonan mortal. E caminda a keda cera pa basta rato, prome cu e investigacion a termina. E Toyota Starlet a worde corta for di tur angulo door di Bomberonan, pa asina extrae e victimanan.
Na famia di e fayecidonan, DIARIO ta extende su mas profundo palabra di condolencia
Matutino DIARIO a screen tur potret, y no a pone ningun imagen unda victimanan ta visible den e accidente, como respet pa e famia.

- Advertisement -

7 COMMENTS

  1. te e dia cu nan bin cu leinan pisa pa auto nan streetlegal cu turbo of tanto valve wel motor di kaya soep up korda bon tur cos cu nos humano traha ta kibra of dana .condolencia na e famianan di walter franken.

  2. Airbags pa tur auto y tene un history di un auto na keuringslokaal. E ta bon pa nos mes como cuidadano di Aruba. Mester pensa pa bin cu camara riba highway y tambe highway patrol vast, tur esaki ta pa spaar nos mes di desgracia. Hopi hende ta gusta drag, pero e ta un deporte cu ta costando bida di hopi hende y cu esey mester trece un cambio rapidamente pa por duna aruba un trankilidad bek. Aworaki tur hende tin miedo di sali riba caya paso bo no sa ki ora bo por encontrabo cu un tegenligger cu tin su auto full drecha pa pusta, turbo, nitro, sin airbags, ocupante nan sin safety belts. Muy probablemente mester pone un paro na dragrace completamente y duna un chens di 3 luna pa tur hende regel nan auto y pone den optima condicion, y corda semper! ta pa bo mes un bon, asina ta no trata na convence pa toch sigui cu dragrace of auto nan “venena”. Meste bin regla nan estricto y ta kita auto dibiaha si e no ta voldoet pa bo mes un seguridad.
    Condolencia na e famia nan di e fallecidonan y esunan hospitalisa pronto recuperacion

  3. tristo y hopi tristo! hopi forsa na e kasa,mama y famianan! mi ta spera ku aruba por bira consiente di velosidad halto na aruba y bira consiente di e dolor ku nan ta laga na famia atras y bira consiente cu once you go you never come back!

  4. Kondolencia na famianan. Mi kyer a felisita Diario cu nan relato completo, mas detalla y mihon di Aruba kompara cu tur otro, y ku boso ta hasi nos orgulloso, debi cu boso NO a rebaha boso mes di publika foto kruel di e viktimanan. Ohala otro websidenan di Aruba tambe sinja di boso!

  5. E noticia ta uno hopi shocking. Mi no por imagina e dolor grandi cu Walter su senjora tin awor aki. Hopi forza na famia Franken den e momento dificil nan aki.

DUNA COMENTARIO

Please enter your comment!
Please enter your name here