Home Hudicial Directora di Departamento di Cultura a perde su caso contra Gobierno

Directora di Departamento di Cultura a perde su caso contra Gobierno

15
0
SHARE
- Advertisement -

JudicialORANJESTAD (AAN): Diaranzon huez a duna su veredicto den un caso cu directora di Departamento di Cultura Ruby Eckmeyer a entama contra Gobierno di Aruba. Señora Eckmeyer a entama e caso, door cu Minister di Economia y Cultura Michelle Hooyboer Winklaar a apunta Jan van der Straten como director ad interim pa algun tempo, door cu tabata tin diferente problema entre e directora y empleadonan di e departamento.Durante tratamento di e caso riba 2 di Maart, abogado Kuster kende a representa Gobierno a trece dilanti cu no ta asina cu sra Eckmeyer a worde manda cas of cu el a worde suspendi.
E abogado a splica cu desde cu tabata tin un reorganizacion na Departamento di Cultura, a surgi problemanan entre empleadonan di e departamento y e directora.

A dicidi di laga un comision haci un evaluacion di e situacion y e Minister a dicidi di pone van der Straten como director ad interim, pa trece trankilidad back den e departamento.

Mientrastanto intencion tabata pues cu e directora temporalmente lo no tin e autoridad di directora, pero cu banda di van der Straten e lo ta activo den e departamento.

Intencion tabata pues pa e evaluacion tuma lugar, sin cu e directora lo tin mucho contacto cu e empleadonan.

Kuster a bisa cu e Minister a haya necesario pa trece van der Straten pa e purba trece back un trankilidad, pasobra hopi di e trahadornan tabata malcontento cu e situacion.

Te hasta tabata tin trahadornan cu ta bao di tratamento psiquiatrico y varios a welga tambe un tempo pasa.

Tabata tin empleadonan cu a indica cu e situacion tabata asina insoportable cu ta yora nan tabata yora.

E abogado a trece dilanti cu sra Eckmeyer ta haci como si fuera Gobierno ta un dictador cu e meta di kite for di trabao, pero segun e abogado si Gobierno tabata tin intencion di kite, e Minister lo a por ehempel prohibie di drenta e departamento pero e Minister no a haci esaki.

Despues cu Eckmeyer a haya sa cu e Minister a dicidi di pone van der Straten como director ad interim, sra Eckmeyer a cuminza bin menos na trabao, tabata tuma dianan extra liber y te hasta el a bay cu su cosnan for di su oficina.

E abogado a trece dilanti cu pa e Minister tabata hopi cla cu directora no tabata tin mucho experiencia den management.

El a bisa tambe cu tin un carta poni na diferente lugar como accion di firma contra e Hulandes Europeo van der Straten y cu segun informacion ta sra Eckmeyer lo ta tras di esaki, pero den corte abogado Hernandez Swaen kende ta representa e directora a bisa cu su cliente no tabata tin nada di haber cu esaki.

Abogado Kuster a bisa huez tambe cu desde cu van der Straten a worde apunta na Departamento di Cultura, trankilidad a bolbe y e empleadonan ta produciendo hopi bon atrobe.

E abogado a bisa tambe cu sra Eckmeyer no a sufri ningun daño pasobra e no a worde kita, e tin su salario ainda y e tin e tarea pa hunto cu van der Straten duna su input.

Abogado Hernandez Swaen a bisa cu e decision cu e Minister a bin cune pa pone un director ad interim ta pone cu sra Eckmeyer a perde su autoridad pa tuma decisionnan cu tin di haber cu maneho y finanzas.

Ora sra Eckmeyer a haya sa intencion di e Minister, el a manda un carta na e Minister pa pidie pa e haya su posicion back manera cu e tabata y ora e Minister a nenga, el a manda un ‘bezwaarschrift’ y un peticion pa e caso sumario.

E abogado a splica cu ora e departamento tabata tin mester un director na 2007, a cuminza un procedura di solicitud y for di e 11 personanan cu a aplica pa e puesto, sra Eckmeyer tabata esun mihor califica y el a worde escogi.

Sinembargo for di momento cu el a haya e puesto, tabata tin un grupo di persona cu tabata contra esaki.

Segun e abogado, e grupo di personanan aki semper ta protesta contra cualkier director.
E abogado a bisa cu sra Eckmeyer sinembargo a keda traha cu entusiasmo tratando di haci tambe ‘team building’.

Hernandez Swaen a bisa cu e forma cu e directora a worde hala un banda no ta e manera corecto.
E abogado a bisa cu un director of directora mester worde duna suficiente tempo pa e haci su trabao, pero Eckmeyer no a haya suficiente tempo y sin base legal a kita autoridad for di dje.

El a bisa cu si un decision asina worde tuma contra un ambtenaar, mester worde duna un bon splicacion di e motibonan exacto, pero esaki no a sosode.

E abogado a bisa tambe cu ta worde bisa cu tur empleado tin problema cu e directora pero cu esey no ta berdad.

Pesey el a pidi huez pa suspende e decreto ministerial y laga e directora haya su autoridad back den su funcion.

E sentencia di huez di Diaranzon sinembargo tabata na fabor di Gobierno.
E huez a indica cu Eckmeyer tin razon ora cu e bisa cu e Minister no ta autoriza den e caso aki pa kite di su puesto di directora, pero Eckmeyer no ta realiza cu e decreto no ta pa kite di su puesto.

E Minister solamente a bin cu un cambio temporal den e contenido di e trabaonan di e directora y segun ex articulo 52 di e ‘landsverordening materiel ambtenarenrecht’ (LMA), e Minister ta autoriza pa haci esaki.

Eckmeyer a keda directora, pero por eherce un parti di su trabaonan so. E huez a indica tambe cu Eckmeyer a bisa cu e kehonan contra dje no tin base, pero esaki no ta nifica cu e Minister no tabata tin motibo di haci un investigacion.

Segun huez, Eckmeyer atravez di su abogado no por a mustra cu e Minister no tabata tin motibo di cuminza cu e investigacion.

Door cu tabata tin base pa un investigacion, e Minister a actua corecto door di duna Eckmeyer menos autoridad y tarea, pa asina limita e influencia cu Eckmeyer lo por tin riba resultadonan di e investigacion.

Huez a bisa si cu Eckmeyer door di esaki ta sufri daño di reputacion, pero esaki no ta sosode innecesariamente y e no ta sosode na un manera inhusto. Pesey huez a dicta cu e peticion di parti di Eckmeyer pa kita e decreto di Minister, ta worde rechaza.

- Advertisement -

DUNA COMENTARIO

Please enter your comment!
Please enter your name here