Divi Links Torneo di Golf pa beneficia e Santuario di Burico
ORANJESTAD (AAN)— The Links na Divi Aruba a organisa y sponsor un torneo di recauda fondo na beneficio di e Santuario di Burico. Tabata un scramble di 2 persona y 18 buraco, atrayendo 26 pareha di hungadornan di golf local y turista, kendenan a tee off pa 9′or di mainta riba diasabra.
KIA Motors a ofrece un auto pa e hole-in-one riba e cancha di e di 7 buraco, y mientras cu niun hende a logra di hinca e bala den un tiro, e oportunidad a provee un competencia excelente.
E Santuario tabatin dos di su buriconan na e evento. “Ban Ban”, kende ta e burico cu a cuminsa e Santuario 13 aña pasa, tabata eynan pa henter e dia. El a pasa bon cu hopi di e hungadornan di golf. Den e parti di atardi el a wordo acompaña pa un di e buriconan mas nobo, “Truffles”, kende a nace 8 siman pasa.
Tur hende a enamora cu e burico femenino chikito, y e santuario tabata tin mercancia di su tienda di regalo obtenibel pa benta, pa tur esnan cu a wordo inspira pa contribui mas.
Pa merdia e hungadornan di golf a saboria un tiki awa y saté di galiña, y na final di e competencia di 18 buraco, The Links na Divi Aruba a provee un buffet excelente di BBQ pa e hungadornan, combina cu e bebidanan di nan escohencia.
E premio pa drive mas largo a bai pa John Every, mientras cu Jolande Brinks a gana pa mas serca di e pin. Den e scorenan general, Angela Yanez y Don Quant a keda na prome lugar, cu Ron Moser y Giovanni van Wijk na di dos lugar.
E Santuario di Burico kier a gradici tur su sponsornan pa nan ayudo den haci esaki un evento sumamente exitoso. Danki na sponsornan cu a hasi e evento aki posibel.
