Ecotech a presenta e planta di reciclahe di mas moderno den e region aki
Como e prome compania pa establece den Freezone na Barcadera
ORANJESTAD (AAN): “E tabata un vision di Ecotech y orguyosamente mi por bisa awe nos ta presenta e prome planta ultra moderno di recyclahe den e region aki”, asina Freddy Kelkboom, gerente general di Ecotech a duna di conoce durante presentacion oficial di e planta di reciclahe di Ecotech situa den zona franca na Barcadera. Ta trata aki di un proyecto cu a dura mas o menos 2 aña di tempo y cu un inversion miyonario.
E proyecto a percura pa 30 cupo di trabao adicional den forma directo mientras cu indirectamente tambe e proyecto a percura pa hopi trabao. Un di e motibo di e proyecto aki ta sinta na e problema serio di sushedad cu nos isla tin y e forma con nos ta deshaci di nos desperdicio.
Den un era moderno, benta sushi na dump no ta normal mas. Motibonan tin varios, manera ta e hecho cu e poblacion di Aruba awor ta mas cu dobel, turismo a crece, construccion a florece, economia a crece, mientras cu e realidad ta cu nos ta importa tur cos y casi no ta exporta nada.
E solucion ta pa rechaza, recupera, recicla y re-usa. Ecotech a dicidi di haci uso di e compania mundialmente renombra Has Koning di Hulanda pa diseña un planta di reciclahe ultra moderno, algo cu ta distingui Aruba for di henter e region aki.
E compania N.M. Heilig B.V. di Hulanda a fabrica y a bin instala e planta hunto cu nos ingenieronan local. Ta trata aki di tecnologia comproba rond mundo.
Durante e presentacion den e planta nobo , a splica cu e trucknan di sushi of bakinan grandi di sushi lo pasa riba un “Weight Bridge” pa por pisa cuanto sushi nan a bin deposita eynan. Unabez den e “Receiving Hall” nan lo deposita nan desperdicio. Ey un machine special lo separa sushi grandi, manera Frigidaire, Stove, Tapijt grandi, Freezer y tur otro material mas grandi cu 70 centimeter.
Unabez cu caba di separa e sushi grandi, lo pone tur otro sushi riba un “conveyer belt” cu lo procesa 30 ton di sushi pa ora. Haciendo uso di presion di biento, magneet y otro methodonan, lo separa carton, papel, corant, plastic, hero bieu, koper, aluminium, santo, piedra y glas.
Na tur lo separa 85% pa 90% di tur desperdicio cu pasa den e machine. Locual ainda no por worde recycla ta sushi organico, pues resto di cuminda. Pero Ecotech tin un proyecto pa den futuro recycla e 10% pa 15% cu ainda lo mester sigui bay dump.
Ecotech a tene cuenta cu tur aspecto den su planta nobo. Asina por ehempel e compania a inverti den un ekipo ultra moderno pa evita stof den e planta. Na practicamente tur parti di e planta tin un sistema di filter pa evita cu ta keda stof.
E filter gigantesco aki ta saca e stof afor y ta tir’e den diferente baki pa por worde re-usa pa traha blokki, como fundeshi bou asfalt, etc. Asina e compania ta promove un cultura di reciclahe den forma total.
Cu e planta nobo y moderno aki, Ecotech tin un capacidad pa recicla 60 mil ton di sushi pa aña, trahando un solo warda di 8 ora pa dia. E total di sushi cu Aruba ta produci pa aña ta mas o menos 180 mil ton. Pues cu e planta aki, Ecotech ta sigura cu e cantidad di sushi cu ta bay dump lo baha drasticamente.
Diferente producto final despues di pasa door di e proceso di recyclahe ta worde paketa den forma di bultonan y ta worde exporta. Pa algun aña caba Ecotech tin un acuerdo cu e compania G&T Trading International Corporation.
E compania aki ta cumpra e productonan recicla di Ecotech y ta rebende nan pa worde re-usa.
Pa algun aña caba Ecotech ta reciclando, aunke den cantidad chikito y ta exporta 10 container di producto recicla pa luna pa Taiwan y Indonesia. Awor cu nan tin nan mesun planta y cu nan lo recicla mayoria di nan propio desperdicio colecta na nan clientenan residencial y comercial, nan ta estima cu lo cuminsa exporta 100 container (2.500 ton) di producto recicla pa luna!
Ecotech ta existi pa 10 aña caba y ta responsabel pa recoge desperdicio comercial y residencial di nan clientenan. Mas o menos 8 aña pasa nan a cuminsa como un di e promenan den e industria di reciclahe y a motiva su clientenan riba e importancia di separacion di desperdicio.
Awendia e compania ta emplea 70 trahador y ta cla pa hiba nos medio ambiente na un siguiente nivel, y promove un cultura di limpieza y un pensamento cu mas nos recicla….menos nos mester benta riba dump pa no lubida e beneficio ambiental cu esaki ta trece cune.
