Encuentronan organiza pa CMB Bank riba desaroyonan economico
ORANJESTAD(AAN): Desaroyonan mundial ta pone hopi instancia tene diferente charla informativo y hopi al caso pa cada un di nan clientenan. Caribbean Mercantile Bank a prepara cuatro encuentro cu nan clientenan den un estilo di desayuno.
Javier Wolter gerente di CMB a splica cu despues di e encuentro di Diamars, e encuentro cu a tuma lugar Diahuebs tabata e di dos di e 4 encuentronan planea.
El a bisa cu Diamars Economista Ben Marapin a papia riba con e ta mira e futuro di nos economia y hopi hende a atende e charla.
E encuentro di Diahuebs tabata riba con bo por haci no negoshi mas mihor ainda.
E tabata specialmente pa hendenan cu tin negoshi cu ta cuminzando awor of negoshinan cu a yega na fase mediano, pa wak si nan por yega na e proximo nivel.
Wolter a splica e motibo cu CMB a cuminza cu e encuentronan aki.
El a bisa cu na prome lugar esaki ta pa tin un mihor relacion cu e clientenan di e banco y tambe pa e prospectonan cu no a bira cliente ainda.
Un otro motibo ta pasobra tur hende kier haci su negoshi mihor.
“Nos como banco ta sinti e responsabilidad pa facilita esey na nos clientenan”.
Esaki segun Wolter, kende a sigui bisa cu e desayunonan aki ta hopi ‘nice’, unda cu bo ta pasa dos ora cu bo clientenan y bo ta habri e vloer riba un sorto di simposio na unda cu nan por bin cu pregunta.
Si nan tin preocupacion nan por trece esaki pa dilanti y nan por haci pregunta riba con e banco ta bayendo y con industria bancario di Aruba en general ta bayendo.
Wolter a splica cu e otro dos encuentronan ta otro siman Diamars y Diahuebs.
