Home Politica Ex-minister Marisol Lopez-Tromp a regala tereno di pueblo durante di campaña 2009...

Ex-minister Marisol Lopez-Tromp a regala tereno di pueblo durante di campaña 2009 pa hotel y condominium

40
1
SHARE
- Advertisement -

Parlamentario Donny Rasmijn:
Total 1.442.462 m2 cu ta mas di 262 veld di futbol banda di otro! ORANJESTAD (AAN): Diaranzon pasa Parlamento a continua cu e reunion riba otorgamento di tereno pa hotel y condominium. Durante di e reunion a keda demostra, pa Ministernan Benny Sevinger y Otmar Oduber, cu hopi tereno di nos dushi pais a worde “regala” pa haci negoshi net durante di periodo di campaña. Minister Sevinger a saca un file di un meneer Sanders cu a haci un peticion riba un tereno di mas cu 32.000 m2 y e ex-minister a otorge.


Den e corespodencianan entre e minister y Sr. Sanders por a ripara cu e ex-minister no kier a rechasa tur e peticionnan apesar cu Director di DIP tabata bisa e ex-minister cu e nan no ta cumpli cu e rekisitonan segun “Landsverordening Uitgifte Eigendommen”. Cada peticion cu a worde nenga door di DIP, e ex-minister tabata pidi DIP pa re-evalua en espera di por haya un advies positivo tog.

Despues di hopi bay bin di corespondencia y eleccion tabata acercando, e minister a otorga e tereno mientras cu e compania no a cumpli cu e rekisitonan. Finalmente a resulta cu e tereno ta pa Sr. Maurice Neme cu aparentemente ta un sponsor grandi di e ex-minister.

Pues si Sr. Neme ta aparentemente un sponsor grandi di Marisol, y Marisol a haci tur lo posible pa Sr. Neme haya e tereno pa haci negoshi promer cu el a baha como minister, nos ta puntra nos mes: Cuanto placa e ex-minister a haya sponsor for di Sr. Neme so?

Esaki kiermen “Woman at Work”? Esaki kiermen bira rico riba custia di pueblo! Anto esey no ta tur pasobra ta 7 tereno a worde otorga den pura promer cu eleccion sin cu nan tabata cumpli cu e rekisitonan.

En total nos ta papia di 1.442.462 metro cuadra di tereno cu ta mas cu 262 veld di futbol poni banda di otro! Mientras cu e ex-minister tabata regala tereno durante di periodo di campaña, cu ta un periodo cu e ex-minister tabatin mester di hopi placa, e homber chikito no tabata haya su tereno regla. Ni esunnan cu el a priminti durante di campaña el no a cumpli cu nan.

Ta e minister actual a otorga e terenonan aunke cu e hendenan por a vota pa Marisol. Ironia di bida ta cu Marisol a kita Sr. Franklin Abath como director di Domeinbeheer y el pone Sr. Pancho Geerman como director di DIP/Domeinbeheer. Ora cu Sr. Geerman a caba di haci tur e trabao, Marisol a kite for di e puesto y el a pone Sr. Sjak Shie. Tur e fiesta di tereno a cuminsa despues di esey.

E ex-minister a hasta duna Sr. Sjak Shie e poder pa firma na su lugar. Dia 11 di november 2009 Sr. Sjak Shie a otorga dos tereno pa un total di mas di 25.000 m2 pa traha condominium. Pa colmo un di nan ta pa Sr. Maurice Neme.

Tur cos ta mustra cu tin hopi negoshi cu a worde haci riba custia di pueblo. Ministernan Sevinger y Oduber a enfatisa cu e investigacionnan a cuminsa caba y cu pronto mas puyito lo sali for di macuto. Y e biaha aki ta Landsrecherche lo saca e puyitonan pasobra e cantidad di pruebanan ta mucho hopi pa e Minister sinta saca nan.

Sevinger a bisa cu si e bay saca tur e papelnan, e lo no por haci su trabao di minister pasobra ta asina hopi tereno a worde otorga pa ex-minister Marisol Lopez-Tromp. “Aki nos ta wak con un Minister cu mester a traha pa pueblo a bira mas bien un agente di Real Estate caminda claramente por mira cu amigonan cerca di dje a worde privilegia”, Donny Rasmijn ta termina.

- Advertisement -

1 COMMENT

  1. Pffff…e love-affair aki cu Marisol ta birando hopi laf mes entretanto. No tin otro noticia pa duna? Mane desaroyo di crisis economico mundial? Con cos ta na Iraq/Afghanistan? E asunto di abuso sexual den iglesia Catolico?

DUNA COMENTARIO

Please enter your comment!
Please enter your name here