Fenomenal y inigualable tabata “E biahe misterioso di Jean”
Arubianonan a demostra cu Teatro a moderniza!
ORANJESTAD (AAN): Fenomenal! Un obra teatral di clase aparte! Esey ta loke por usa pa describi e fabuloso obra teatral, cu Dr. Benny Heinze a trece den fin di siman den Cas di Cultura. Ta trata di e obra “E biahe Misterioso di Jean”.
Dr. Heinze y tur esnan cu lo actua den e obra aki ta su pashent nan. Asina Dr. Heinze a escoge un total di 49 persona pa e obra cu participacion di un brass band.
E storia ta draai rond di un studiante Jean, kende tin un habilidad admirable riba piano. E ta sufri sinembargo di un malesa, cu ni e personahe di Dr. Brown, hunga pa Jossy Brokke por a cura.
Jean ta pasa pa un otro mundo, y e “fraccion di momento” aki cu e ta bishita e otro parti di bida… ta loke ta worde presenta na un forma splendoroso riba escenario di Cas di Cultura.
Un show unico, cu efectonan di Rayo Laser, y bunita uso di Smoke Machine, y iluminacion abao… a crea un “cielo” masha bunita mes! Tambe admirable ta con Angel ta baha for di cielo, y esaki hunga pa psicologo Tony Green.
Tambe a goza di presentacion inigualable di Tica Giel, cu su fabuloso voz sin eror alguno, cu ta trece e obra aki na un bida alegre, hungando como un angel.
No por keda sin menciona Gina Nuboer, kende sin duda alguno a duna un presentacion perfecto, cu hopi drama y dedicacion, y hasta lagrima por a mira ta basha for di su wowonan. Un berdadero artista di clase mundial.
Algun parti tabata contene sketch hopi emocional, cu lo no a laga ningun wowo seco den publico. Tambe e parti di unda demoñonan ta trata na haya e alma di Jean, ta pone hende haya un krop den nan garganta.
E prome parti di e obra, a mustra e “banda alegre” di e bida di Jean, cu su cumpleaño festivo, cu e.o. baile, brassband, y sacamento di potret pa loco. Tur artista riba escenario tabata bunita maquilla, y hopi tambe a canta hunto pa asina e sonido a keda presenta na un forma harmonioso pa publico.
“E biahe Misterioso di Jean” tabatin su partinan divertido tambe, pero e mihor parti tabata e atencion pa cada detaye! Cada trahe di angel, combina cu un escena cu asistencia audiovisual, a sa di pone e publico keda disfruta mas y mas di e show. Dr. Heinze tambe a haci un aparicion riba escenario.
DIARIO kier a felicita tur esnan envolvi den e obra teatral aki! For di esun di mas chikito, te esnan mas grandi. Sinny tambe a keda masha bunita.
Pesey na final, tur hende a duna e artistanan, un standing ovation mereci!
