Diario Online

Fiscal Mayor no ta haya cu ladronnan ta haya mucho tiki castigo

Publication: Thursday, 4 March 2010. Categoria: Judicial

ORANJESTAD (AAN): Recientemente durante un entrevista, a mustra Fiscal Mayor Peter Blanken riba e hecho cu hopi hende den comunidad ta rabia ora cu un ladron cu a causa destruccion y a horta articulonan for di cas di hende, despues di un tempo relativamente cortico ta Sali back for di prison y ta sigui comete crimen. Segun Blanken, ta asina cu unda cu un kiebro tuma lugar un denuncia ta worde entrega na polis y si por e asina yama servicio tecnico (technische dienst) ta haci un investigacion y asina ta wak si por haya evidencia pa acusa un hende pa e hecho criminal.
Si bo bay corte bo ta wak tambe un cantidad grandi di hende acusa di ladronicia y nan ta worde castiga pa esaki.

Esaki segun Blanken kende a sigui bisa cu bo ta mira pues cu no ta asina cu nan no ta worde castiga. Sinembargo no por resolve tur caso si no tin suficiente evidencia.

A mustra Blanken riba e hecho cu e hendenan ta keha mas di e hecho cu e castigonan no ta suficientemente halto.

Blanken a bisa cu e no ta di acuerdo cu e ponencia ey.
Segun e fiscal mayor, castigonan basta halto ta worde duna.
El a bisa si cu ceramento di e ladronnan no ta resolve tur cos.

Tin algun cu no ta cay back den ladronicia, pero un cantidad basta grandi ta sigui horta.
Ora un persona worde gara cu anteriormente a worde cera caba pa mesun crimen, e ta worde considera un recidivista y e ora ey su castigo ta bira mas halto.

Un parti grandi di e recidivistanan aki ta e chollernan y pesey lo ta bon pa purba yuda nan sali for di nan adiccion.