Diario Online

Glenbert via tio Hendrik tambe ta bay Corte pa scapa e trabao cual casi nunca el a presenta

Publication: Thursday, 11 March 2010. Categoria: General

Edmond su placa ta cabando y ta evaluando caso den corte…
ORANJESTAD (AAN): Edmond parce su placa ta cabando. E reserva ainda ta grandi pero e fiesta di lotto a termina. Pesey mes Edmond a cuminsa purba spanta lotto. Tur tipo di porkeria esnan di friends and family tabata haci den lotto pa deporte. Placa tabata sali manera awa den direccion di famia Croes pa tur tipo di negoshi cu nan a lanta. Ta importante pa servicio di impuesto tambe tira un bista pa mira si e grupo aki tabata cumpli cu leynan fiscal.

Hendrik cu semper a perde casonan uno tras di otro pa gobierno pero ganando miyones, posiblemente lo ta e abogado di Edmond.

Asina mes e tipo di menazanan ey no ta spanta ningun hende pasobra ta prueba tras di prueba di disaster den maneho di lotto lo sali bin dilanti ora e investigacion termina.

Un otro mas cu tambe ta entamando un caso den corte ta Glenbert. Glenbert ta e sobrino di Rudy Croes formando parti di gabinete Oduber te cu September 2009. Glenbert a ser horca pa MEP y keto bay tin basta aña pa paga hopi placa pa loke cu el a firma pa e trahadornan di WEB e tempo aya.

Ta MEP a horca Glenbert cu e ta den e situacion asina awe. Bao menaza pa campaña pa su prima ultimo eleccion a logra medio saca un man y duna Glenbert trabao. E trabao ey tabata parce solamente riba papel y Glenbert tabata cobra tur luna.

Asina mes Glenbert no tabata presenta na trabao ningun dia segun testigonan. Despues di e derota cu MEP a haya na 2009 e gobierno nobo cu a sinta no a mira Glenbert ningun dia na trabao.

Awor cu el a haya carta, hunto cu algun otro campañador cu tambe tabata na cas, cobrando sin traha, awor Glenbert a bati na porta di tio Hendrik pa bringa caso pe. Esey ta su derecho sigur, pero por bisa tambe cu esey por a worde evita si el a presenta na trabao.