Diario Online

Habitantenan di Simeon Antonio ta hopi fada

Publication: Wednesday, 10 March 2010. Categoria: General

ORANJESTAD(AAN): Maribel Tromp ta un di e habitantenan cu a bira victima mas cu un biaha di e rumannan Rosario di Simon Antonio. Diamars e tambe tabata presente pa entrega e carta cu firma na minister di husticia. Despues di entrega e carta nos a logra entrevista cune unda el a splica exactamente kico ta e preocupacionnan di e habitantenan di e bario y ki alivio nan tin actualmente, awor cu e dos rumannan Rosario ta cera na KIA. Segun sra Tromp, for di basta tempo e hendenan tabata bezig cu e proceso aki di haya firma pa e carta.
El a splica cu e habitantenan di e bario ta worde teroriza pa algun persona, den sentido cu nan ta horta den casi tur cas y mas cu un biaha.

Tin casnan na unda e ladronnan a horta 4 pa 5 biaha. E bario a notifica Cuerpo Policial di esaki na varios occasion, pero nan no a haya atencion debido.

A base di combersacionnan cu polis di bario, a dicidi di traha un carta, colecta e firmanan y entrega esaki na e instancianan concerni.

E señora a sigui bisa cu e habitantenan di e bario no tin e trankilidad y seguridad mas cu tabata tin antes.

Tin hopi uso di droga den e bario, como tambe bendemento di articulonan cu a worde horta den e bario mes.

Tur sorto di cos ta sosode den e bario y door cu e ta situa tras di aeropuerto, no tin un tipo di control of vigilancia di parti di polis. E habitantenan di e bario ta hopi cansa y fada.
E señora a bisa cu e personanan problematico, incluyendo pues e rumannan Rosario mester worde persigui penalmente, pero mirando cu nan ta adicto na droga nan ta sigui horta, mientras cu nan no ta bibando na e mihor manera.

Banda di cera nan, mester busca un manera pa yuda nan Sali for di e adiccion, asina nan no tin e necesidad di bay horta pa cumpra droga. Apesar cu nan a haci hopi malo, ta hende nan ta keda.