Hayazgo Arqueologico Fascinante den Centro di Playa
Presentacion audiovisual dia 18 di Maart
ORANJESTAD (AAN): E trabaonan cu ta andando den centro di Oranjestad a conduci na un hayazgo arqueologico importante den e ultimo dianan di Februari. Tabata e trahador, sr. David Diaz kende trahando cu su coleganan na comienzo di Caya Grandi a nota algo inusual den e subsuelo di calichi. E equipo di Departamento Cientifico di Museo Arqueologico Aruba a acudi na e e sitio y a haci trabaonan necesario manera e.o. colecta tur material den un tempo cortico, pa no trece tardanza den e trabaonan menciona.
Ya back na museo a ripara cu e hayazgo ta uno sumamente fascinante ya cu ta trata di resto di obhetonan perteneciente na habitantenan di Oranjestad den e periodo di 1000 pa 1917. A haya mas tanto material cu ta relata na come, bebe y cushina.
Entre e material tin restonan di ceramica, glas, cocolishi y weso manera esun di tortuga. Ta pensa cu e material a ser montona den e buraco caminda a hay’e, ora cu Gezaghebber Wagemaker a ordena pa haci un limpieza den Oranjestad y asfalta locual awe ta entrada di Caya Betico Croes, na 1929.
E material ta conta un historia fascinante di Paardenbaai/Oranjestad mustrando cu e uso di e area aki pa biba ta data for di tempo cu Indiannan Caquetio tabata habita nos isla.
E posicion geografico di Paardenbaai obviamente tabata atractivo tanto pa e habitantenan den Pre-historia como pa esnan den e siglo 16 pa awor. Restonan di material colonial ta conta nos un tiki mas di e bida diario di esnan cu a biba e fundacion di Oranjestad despues di 1636.
Resultadonan ta indica cu e restonan di kopi, tayo y otro material pa sirbi cuminda ta procedente den nan mayoria di Inglatera y Hulanda. Composicion, diseño y patronchi di e material aki ta un indicacion di e gusto y nivel social di e habitantenan di Oranjestad di siglo 17 pa 19. Poco poco ta sacando y documentando mas informacion cual Museo Arqueologico ta desea di comparti cu publico dia 18 di Maart venidero.
E dia aki drs. Raymundo Dijkhoff,lo mustra resultadonan preliminar di e investigacion riba e obhetonan aki den un presentacion audiovisual. Drs. Dijkhoff ta encabeza e investigacion y documentacion di e hayazgo.
Dia 18 di maart Museo Arqueologico lo ta habri di 10’or di mainta pa 3’or di atardi y e presentacion lo ta pa 1’or di merdia den auditorio di museo. Entrada ta gratis, un y tur ta bon bini.
h.ignacio
Loke mi no ta compronde na hulanda arubianonan i
stranheronan ta wordo kita for di trabao pa motibo di crisis. kon por ta ku nos tin un gezaghebber na aruba ku fam wagemaker no tin un arubiano ku por ser gezaghebber di aruba.strayo.danki
Ivonne
Ignacio, mi kier SA, cu lo bo tin cu lesa e articulo un biaha mas. Gezagheber Wagenmaker tbt Gezagheber den anja 1929 si mi no ta kiboca Somebody corigi mi si mi ta fout Esaki ta algo hopi interesante pa sa
Manolo
Di e comentario di Sr. Ignacio mi por deduci cu e kier hasi algo pret cu e famoso Gezagheber Wagenmaker. Pero na anja 1929 e personahe aki a inicia un transformacion di aspecto urbanistico di Aruba cu un vision enorme pa su tempo. Su interes pa cu desaroyo di infraestructura na Aruba a conduci na creacion di DOW. E cronica di su tempo ta mustra su persona como un “gentleman” hopi stima pa comunidad Arubano. Asina ta Sr. Ignacio, no preocupa pa cu “gezagheber” di Aruba na naja 1929.